ភ្នំពេញ ៖ កាកបាទក្រហមកម្ពុជា ដែលមានសម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ជាប្រធាន កាលពីរសៀលថ្ងៃទី២៩ ខែធ្នូ ឆ្នាំ២០២៣ បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ និងសហការី ចុះសួរសុខទុក្ខ និងនាំយកអំណោយមនុស្សធម៌ ជួយសម្រាលការលំបាកដល់បុគ្គលិក នៃសមាគមវិទ្យុ និងទូរទស្សន៍អនឡាញជនពិការភ្នែក ចំនួន៩០នាក់ ដែលមានការិយាល័យកណ្តាលស្ថិតនៅភូមិ១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

មានប្រសាសន៍សំណេះសំណាលក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហ មកម្ពុជា បានមានប្រសាសន៍ថា ស្របពេលនៃពិធីអបអរសាទរខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនៃនយោបាយ ឈ្នះ ឈ្នះ និងខួប៥ឆ្នាំនៃការកសាងវិមាន ឈ្នះ ឈ្នះ កាកបាទក្រហមកម្ពុជា ដែលមានសម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យលោកជំទាវផ្ទាល់ និងសហការី ចុះសួរសុខទុក្ខ និងនាំយកអំណោយមនុស្សធម៌ ជួយសម្រាលការលំបាកដល់ ជនមានពិការភាពចំនួន៩០នាក់ ដែលបម្រើការងារនៅក្នុងសមាគមវិទ្យុ និងទូរទស្សន៍អនឡាញសំឡេងជនពិការភ្នែក (VOB)នេះ។ 

សូមបញ្ជាក់ថា សមាគមវិទ្យុ និងទូរទស្សន៍អនឡាញសំឡេងជនពិការភ្នែក បានចូលរួមផ្សព្វផ្សាយពីគោលនយោ បាយរបស់រាជរដ្ឋាភិបាល បញ្ជ្រៀបចំណេះដឹងដល់ជនមានពិការភាព និងផ្តល់ព័ត៌មានសន្តិសុខសង្គមជាដើម ដែលមានទីស្នាក់ការកណ្តាលនៅរាជធានីភ្នំពេញ និងសាខាខេត្តបាត់ដំបង ខេត្តបន្ទាយមានជ័យ និងខេត្តកំពង់ចាម។ សមាគមន៍នេះត្រូវបានទទួលការឧបត្ថម្ភ និងបង្កើតឡើងទាំងស្រុងពីសំណាក់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងបុត្រាបុត្រី។ ដោយសារថាសមាគមនេះទើបនឹងបង្កើតថ្មី បានធ្វើឱ្យបងប្អូនជនមានពិការភាព ជួបប្រទះនូវការលំបាកខាងផ្នែកជីវភាពរស់នៅប្រចាំថ្ងៃ។ ហេតុដូចនេះហើយដោយមើលឃើញពីសេចក្តីត្រូវការចំពោះមុខ ក្នុងឱកាសបុណ្យចូលឆ្នាំថ្មី ឆ្នាំសកល ២០២៤ ផងនោះ ទើបសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់ការឧបត្ថម្ភ ជូននូវអំណោយរួមមាន៖ អង្ករ២តោន, អង្ករសុខភាព២០កេស, មី២០កេស, ត្រីខ៥០០កំប៉ុង, ទឹកត្រី៦០ដប, ទឹកបរិសុទ្ធ១០កេស, ភេសជ្ជៈ៥កេស, ស្ករស៥០គីឡូក្រាម, ទឹកដោះគោខាប់១០០កំប៉ុង, អំបិល១០០គីឡូក្រាម, តែ១០គីឡូក្រាម, អាល់កុល៣០ប៊ីដុង និងថវិកា១០លានរៀល៕ អត្ថបទៈ សំ ងីម