ប្រទេសចិន នៅថ្ងៃសុក្រ (ទី២៩ ខែធ្នូ) នេះ បានតែងតាំងលោក Dong Jun ជារដ្ឋមន្ត្រីការពារជាតិថ្មីរបស់ខ្លួន ដើម្បីជំនួសរដ្ឋមន្ត្រីចុងក្រោយ ដែលបានបាត់មុខ កាលពី ៤ខែមុន។

ការតែងតាំងដោយសមាជិកសភាចិន កើតមាននៅពេលដែលប្រធានាធិបតីចិន លោក Xi Jinping ធ្វើឲ្យយោធាប្រសើរឡើង ដែលជាផ្នែកមួយនៃការជំរុញរបស់លោក ដើម្បីធ្វើឲ្យប្រទេសចិនក្លាយជាមហាអំណាចពិភពលោក ជាគោលដៅ ដែលបានបង្កការព្រួយបារម្ភដល់ប្រទេសជិតខាងជាច្រើន។

តួនាទីជារដ្ឋមន្ត្រីការពារជាតិរបស់ប្រទេសចិន គឺជាមុខមាត់សាធារណៈរបស់កងទ័ពរំដោះប្រជាជនចិន ក្នុងការចូលរួមរបស់ខ្លួនជាមួយប្រព័ន្ធផ្សព្វផ្សាយ និងជាមួយយោធាផ្សេងទៀត។

យ៉ាងណាក្ដីមិនដូចប្រទេសដទៃទេ ក្រសួងមិនសូវនិយាយពីគោលនយោបាយការពារជាតិ ឬការគ្រប់គ្រងយោធានោះឡើយ ជាវិស័យ ដែលស្ថិតក្រោមការត្រួតពិនិត្យរបស់គណៈកម្មការយោធាមជ្ឈិម ពោលគឺជាក្រុមឥស្សរជន ដែលដឹកនាំដោយលោក Xi។

លោក Dong វ័យ ៦២ឆ្នាំ នៅមុននេះ គឺជាប្រធានកងទ័ពជើងទឹករបស់កងទ័ពរំដោះប្រជាជនចិន។ លោកត្រូវជំនួសតំណែងរបស់លោក Li Shangfu ដែលបានចូលកាន់តំណែងជារដ្ឋមន្ត្រីការពារជាតិ កាលពីខែមីនា ប៉ុន្តែមិនត្រូវបានឃើញជាសាធារណៈ ចាប់តាំងពីថ្ងៃទី២៥ ខែសីហា។

ទីភ្នាក់ងារសារព័ត៌មាន Reuters ដោយដកស្រង់ពីប្រភពនានា បានរាយការណ៍ថា លោក Li កំពុងស្ថិតនៅក្រោមការស៊ើបអង្កេតពីបទពុករលួយទាក់ទងនឹងលទ្ធកម្ម និងការអភិវឌ្ឍឧបករណ៍៕