អ៊ីរ៉ង់៖ អ្នកជំនាញអ៊ីរ៉ង់ម្នាក់ បាននិយាយថា ភាគីនយោបាយទាំងអស់នៅក្នុងប្រទេសអ៊ីរ៉ង់ បានឈានដល់មតិរួម លើគោលជំហរទីក្រុងតេអេរ៉ង់ នៅក្នុងកិច្ចពិភាក្សាវិលត្រឡប់មករកកិច្ចព្រមព្រៀងនុយក្លេអ៊ែរវិញ ដោយពួកគេបានឯកភាពថា ការផ្លាស់ប្តូររដ្ឋាភិបាល នឹងមិនប៉ះពាល់ដល់ដំណើរវិវត្តន៍ទៅមុខនៅក្នុងកិច្ចចរចានោះទេ។
ក្រសួងមហាផ្ទៃអ៊ីរ៉ង់ បានប្រកាសឲ្យដឹងកាលពីថ្ងៃសៅរ៍ថា លោកអេប្រាហ៊ីម រ៉ៃស៊ី បានឈ្នះការបោះឆ្នោតជ្រើសរើសប្រធានាធិបតី ដោយទទួលបានសំលេងឆ្នោត ៦០ភាគរយ ។ លោករ៉ៃស៊ី នឹងបន្តវេនពីលោកហាសាន់ រូហានី នៅថ្ងៃទី ០៣ ខែសីហាខាងមុខនេះ។
លោកហ៊ូសេន រូយវ៉ារ៉ាន់ គឺជាអ្នកអត្ថាធិប្បាយនយោបាយអ៊ីរ៉ង់ បាននិយាយថា ប្រទេសមួយនេះ នឹងបំពេញកាតព្វកិច្ចរបស់ខ្លួន បើសិនជាសហរដ្ឋអាមេរិកវិលត្រឡប់មកកាន់កិច្ចព្រមព្រៀងនុយក្លេអ៊ែរវិញ។
លោកបន្តថា ភាគីនយោបានអ៊ីរ៉ង់ បានឈានដល់មតិរួមលើកិច្ចព្រមព្រៀងនុយក្លេអ៊ែរ ហើយអ៊ីរ៉ង់ នឹងអនុវត្តន៍តាមកាតព្វកិច្ចរបស់ខ្លួន បើសិនជាអាមេរិកវិលត្រឡប់មកវិញ ។ គ្មានភាគីណាមួយជំទាស់នឹងគោលជំហរមួយនេះនោះទេ។
គួរឲ្យដឹងថា ភាគីដែលជាប់ពាក់ព័ន្ធនឹងកិច្ចព្រមព្រៀងនុយក្លេអ៊ែរអ៊ីរ៉ង់ បាមាននូវជំនួបផ្តាច់ព្រ័ត្រ ដែលជាជំនួបជុំទី៦ នៅក្នុងទីក្រុងវីយែន ប្រទេសអូទ្រីស ដើម្បីពិភាក្សាលើការចាប់ផ្តើមអនុវត្តន៍ឡើងវិញ កិច្ចព្រមព្រៀងមួយនេះ ក៏ដូចជាដកចេញទណ្ឌកម្មអាមេរិកពីអ៊ីរ៉ង់៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
