ពិភពលោកបានស្វាគមន៍ឆ្នាំ២០២៤ ជាមួយនឹងភាពចម្រុះនៃការប្រារព្ធពិធី និង​ការ​ឆ្លុះបញ្ចាំង​ដ៏​ស្ងប់​ស្ងាត់​ពីបណ្ដាមេដឹកនាំពិភពលោក។ នៅក្នុងប្រទេសអូស្ត្រាលី ទីក្រុងស៊ីដនី បាន​សាទរ​ដល់​ឆ្នាំ​២០២៤ ជាមួយនឹងការបាញ់កាំជ្រួចដ៏គួរឱ្យភ្ញាក់ផ្អើលដែលបង្ហាញពីកាំជ្រួចពណ៌ប្រាក់ និងមាស។

ចំណែក​នៅតំបន់សង្រ្គាមហ្កាហ្សាវិញ ប្រជាជនមានក្តីសង្ឃឹមតិចតួចណាស់ថាឆ្នាំ២០២៤ នឹង​នាំ​មក​នូវ​ភាពធូរស្បើយ បន្ទាប់ពីសង្គ្រាមអ៊ីស្រាអែលរយៈពេល ១២​សប្តាហ៍​ដើម្បី​កម្ចាត់​ក្រុម​ហាម៉ាស។

នៅដាណឺម៉ាក ម្ចាស់ក្សត្រី ម៉ាហ្រ្គេតថេ ទី២ (Margrethe II) បានប្រើ​សុន្ទរកថា​ប្រចាំ​ឆ្នាំ​ក្នុង​ឆ្នាំ​ថ្មី​របស់​ទ្រង់​កាលពីថ្ងៃអាទិត្យ (៣១ ធ្នូ) ដើម្បីប្រកាសថាព្រះនាងនឹងដាក់រាជ្យនៅថ្ងៃទី១៤ ខែមករា បន្ទាប់​ពីសោយរាជ្យបាន ៥២ឆ្នាំ ហើយនឹងត្រូវបានស្នងរាជ្យបន្តដោយបុត្រាច្បងគឺព្រះអង្គម្ចាស់ ហ្រ្វេដេរីក (Frederik)។

នៅប្រទេសរុស្ស៊ី ប្រជាជនកំពុងប្រារព្ធពិធីចូលឆ្នាំថ្មី ទាំងមាន​ការបារម្មណ៍​អំពី​សង្រ្គាម​របស់​ប្រទេស​ខ្លួន​នៅអ៊ុយក្រែន ហើយក៏មិនមានការបាញ់កាំជ្រួចដែរនៅឆ្នាំនេះ។ នៅក្នុង​ប្រទេស​ចិន​វិញ ការប្រារព្ធពិធីចូលឆ្នាំថ្មីមានភាពអ៊ូអរដោយមានទង់ជាតិ និងចម្រៀង​ជាតិ​ខណៈ​មនុស្សម្នា​ច្រើន​កុះករ​នាំគ្នារងចាំមើលកាំជ្រួចឆ្នាំ២០២៤។

នៅសហរដ្ឋអាមេរិក ប្រជាជនក្នុងរដ្ឋញ៉ូវយ៉ក បានប្រមូលផ្តុំគ្នានៅទីលានចតុរង្គ ថាមស៍ ស្ខ្វែរ (Times Square) របស់ទីក្រុងម៉ានហាតថាន (Manhattan) ដើម្បីរង់ចាំប្រារព្ធ​ឆ្នាំថ្មី​ និង​មើល​កាំជ្រួច​ដែល​ភ្លឺនៅពាក់កណ្តាលអធ្រាត្រ បន្ទាប់ពីការសម្តែងរបស់ក្រុមតន្ត្រីករ។

លើស​ពី​នេះ​ទៀត កន្លែងជាច្រើនទៀត និងមនុស្សម្នា​ជុំវិញ​ពិភព​លោក​ក៏​បាន​បា្ររព្ធ​ពិធី​លា​ឆ្នាំ​ចាស់​២០២៣ និងស្វាគមន៍ឆ្នាំថ្មីជាមួយការបាញ់កាំជ្រួចអបអរដ៏ភ្លឺផងដែរ ខណៈពេល​ដែល​មាន​ក្ដី​សង្ឃឹម​សម្រាប់សន្តិភាព និងស្ថិរភាពពិភពលោក ដែលដូចជាប្រទេសបារាំង អាល្លឺម៉ង់ អង់គ្លេស រួមទាំងប្រទេសជាច្រើនទៀតជុំវិញពិភពលោក៕