កម្ពុជាប្រមូលចំណូលមិនមែនសារពើពន្ធពីវិស័យរ៉ែ ក្នុងបំណាច់ឆ្នាំ ២០២៣ បានប្រមាណ ៥០ លានដុល្លារ ដោយបានកើនឡើងគួរកត់សម្គាល់ ខណៈដែលប្រតិបត្តិការរ៉ែសំណង់ រ៉ែមាស និង​រ៉ែ​ឧស្សាហកម្មផ្សេងៗកំពុងកើតឡើងយ៉ាងផុលផុស។

តាមរយៈកម្រងវីដេអូ អំពីសមិទ្ធផលធំៗនៃការអភិវឌ្ឍវិស័យថាមពល រ៉ែ និងប្រេងកាត របស់​ព្រះរា​ជាណាចក្រកម្ពុជា ក្នុងនោះចំពោះវិស័យរ៉ែ កំពុងមានការរីកចម្រើនយ៉ាងខ្លាំង ដោយ​វិស័យ​នេះ​បាន​ចូល​រួមយ៉ាងសំខាន់ក្នុងការចូលរួម អភិវឌ្ឍន៍ប្រទេស ដែលធានា​បានទាំងស្រុង នៃ​ការ​ផ្គត់ផ្គង់​រ៉ែសំណង់ សម្រាប់ការសាងសង់ហេដ្ឋារចនាសម្ព័នផ្សេងៗ, ចំពោះបញ្ហានេះ វិស័យរដ្ឋ និង​ឯកជន បានរួមគ្នាធ្វើការសិក្សាស្រាវជ្រាវ ស្វែងរុករក និង​អភិវឌ្ឍន៍​ធនធាន​រ៉ែ​ទទួល​បាន​ផ្លែផ្កា​ជា​ហូរហែរ។

ជាក់​ស្តែងផលិតផលរ៉ែសំខាន់រួមមាន ផលិតផលស៊ីម៉ង់ត៍ បានប្រមាណ ៩ លានតោនក្នុងមួយឆ្នាំ និង​រ៉ែមាសបានចំនួន ៩,៥ តោន គិតត្រឹមបំណាច់ឆ្នាំ ២០២៣។ ក្រៅពី​នេះការធ្វើ​ប្រតិបត្តិការ​រ៉ែ​សំណង់ និងរ៉ែឧស្សាហកម្មផ្សេងៗ បានផ្តល់ឱកាសដល់កម្ពុជា អាចនាំធនធានរ៉ែខ្សាច់ ផលិតផល​ពាក់​កណ្តាលសម្រេចថ្មអារ រ៉ែដែក និងដុំមាសចេញទៅក្រៅប្រទេសផងដែរ។

ជុំវិញ​ប្រតិបត្តិការនៃអាជីវកម្មខាងលើនេះ, បាន​ធ្វើ​ឲ្យ​កម្ពុជា​ទទួល​បាន​ចំណូល​មិន​មែន​សារ​ពើរពន្ធ ដែលទទួលបានប្រចាំឆ្នាំ មានការកើនឡើងជារៀងរាល់ឆ្នាំ គិតចាប់ពី ២ លានដុល្លារ នៅ​ក្នុង​ឆ្នាំ ២០១៣ កើនដល់ប្រមាណ ៥០ លានដុល្លារ ក្នុងឆ្នាំ ២០២៣។ ជាមួយការគ្រប់គ្រង និង​អភិវឌ្ឍន៍​នេះ ចក្ខុវិស័យវិស័យរបស់រាជរដ្ឋាភិបាលកម្ពុជាចំពោះវិស័យរ៉ែ គឺអភិវឌ្ឍន៍ធនធានរ៉ែ ដើម្បី​ផលប្រយោជន៍សេដ្ឋកិច្ច និងសង្គម ប្រកបដោយអភិបាលកិច្ចល្អ និងទទួល​ខុសត្រូវ​ខ្ពស់​លើ​ផ្នែក​បរិស្ថាន៕ អត្ថបទ៖ សុន រ៉ាឌី