​

អគ្គលេខាធិការរងអង្គការសហប្រជាជាតិ ទទួលបន្ទុកកិច្ចការមនុស្សធម៌ លោក Martin Griffiths កាលពីថ្ងៃព្រហស្បតិ៍ បានអំពាវនាវឱ្យមានសកម្មភាពជាអន្តរជាតិដើម្បីបញ្ឈប់ការប្រយុទ្ធគ្នានៅក្នុងប្រទេសស៊ូដង់។ សង្រ្គាមរយៈពេលជិត៩ខែ បានធ្វើឱ្យប្រទេសស៊ូដង់ធ្លាក់ចុះយ៉ាប់យ៉ឺនខ្លាំង ដែលមានការបំផ្លិចបំផ្លាញកាន់តែច្រើនឡើង ពីមួយថ្ងៃទៅមួយថ្ងៃ។ ខណៈជម្លោះរាលដាល ទុក្ខវេទនារបស់ប្រជាជនកាន់តែជ្រៅឡើង ដំណើរការទទួលបានជំនួយមនុស្សធម៌ក៏ថយចុះ ហើយក្តីសង្ឃឹមក៏ថយចុះផងដែរ។ លោក Griffiths បាននិយាយនៅក្នុងសេចក្តីថ្លែងការណ៍ថា បញ្ហានេះមិនអាចឲ្យបន្តទៅទៀតនោះទេ។ លោកបាននិយាយថា ឆ្នាំ ២០២៤ ទាមទារឱ្យសហគមន៍អន្តរជាតិ ជាពិសេសអ្នកទាំងឡាយណាដែលមានឥទ្ធិពលលើភាគីជម្លោះនៅក្នុងប្រទេសស៊ូដង់ មានចំណាត់ការយ៉ាងម៉ឺងម៉ាត់ និងបន្ទាន់ ដើម្បីបញ្ឈប់ការប្រយុទ្ធ និងការពារប្រតិបត្តិការមនុស្សធម៌ ដែលសំដៅដល់ការជួយជនស៊ីវិលរាប់លាននាក់។ មនុស្សជាង ៥០០.០០០នាក់បានភៀសខ្លួនចេញពីការប្រយុទ្ធគ្នានៅក្នុង និងជុំវិញរដ្ឋធានីរដ្ឋធានី Wad Medani ជាកន្លែងជ្រកកោនយូរមកហើយសម្រាប់អ្នកទាំងឡាយដែលគ្មានទីជម្រកដោយការប៉ះទង្គិចនៅកន្លែងផ្សេងៗ។ លោក Griffiths បាននិយាយថា ការភៀសខ្លួនចេញដ៏ច្រើន ដែលកំពុងបន្ត ក៏អាចជំរុញឱ្យមានការរាលដាលយ៉ាងឆាប់រហ័សនៃការផ្ទុះជំងឺអាសន្នរោគនៅក្នុងរដ្ឋនេះ ដោយមានករណីសង្ស័យច្រើនជាង ១.៨០០ករណី ត្រូវបានរាយការណ៍នៅទីនោះរហូតមកដល់ពេលនេះ។ នៅទូទាំងប្រទេសស៊ូដង់ មនុស្សជិត ២៥ លាននាក់ នឹងត្រូវការជំនួយមនុស្សធម៌នៅឆ្នាំ ២០២៤នេះ ។ ប៉ុន្តែជម្លោះកាន់តែខ្លាំង កំពុងធ្វើឱ្យពួកគេភាគច្រើនពុំមានលទ្ធភាពទទួលបាន។ លោកបាននិយាយថា សង្រ្គាមបានធ្វើឱ្យមានវិបត្តិជនភៀសខ្លួនច្រើនបំផុតរបស់ពិភពលោក ដោយបានធ្វើឲ្យមនុស្សជាង ៧ លាននាក់គ្មានទីជម្រក ប្រមាណ ១.,៤ លាននាក់ បានឆ្លងចូលទៅក្នុងប្រទេសជិតខាង ដែលមានជនភៀសខ្លួនយ៉ាងច្រើនរួចទៅហើយ។