រដ្ឋមន្ត្រីក្រសួងដឹកជញ្ជូនជប៉ុន លោក Tetsuo Saito នៅថ្ងៃសុក្រ (ទី៥ ខែមករា) នេះ បាននិយាយថា ផ្លូវរត់ នៅអាកាសយានដ្ឋាន Haneda ក្នុងទីក្រុងតូក្យូ ដែលត្រូវបានបិទ ចាប់តាំងពីមានការបុកគ្នា រវាងយន្តហោះ២ ទំនងជានឹងបើកឡើងវិញ នៅថ្ងៃចន្ទ (ទី៨ ខែមករា)។

ក្រុមបុគ្គលិក នៅអាកាសយានដ្ឋាន ដែលជាកន្លែងមមាញឹកបំផុតមួយរបស់ពិភពលោក បានចាប់ផ្តើមបោសសម្អាតបំណែកយន្តហោះរបស់ក្រុមហ៊ុនអាកាសចរណ៍ Japan Airlines (JAL) ចេញពីផ្លូវរត់ នៅថ្ងៃសុក្រនេះ ខណៈដែលការស៊ើបអង្កេតលើមូលហេតុនៃឧបទ្ទវហេតុ ដែលបណ្ដាលឲ្យមានអ្នកស្លាប់នេះ នៅតែបន្តធ្វើ។

សមាជិក ៥នាក់ ក្នុងចំណោមអាកាសយានិក ៦នាក់ នៅលើយន្តហោះឆ្មាំឆ្នេរល្បាតសមុទ្រ បានស្លាប់ នៅពេលដែលយន្តហោះដ៏តូចនោះ បានបុកជាមួយយន្តហោះរបស់ក្រុមហ៊ុនអាកាសចរណ៍ JAL កាលពីថ្ងៃអង្គារ (ទី២ ខែមករា) ប៉ុន្តែមនុស្ស ៣៧៩នាក់ នៅលើជើងហោះហើររបស់ក្រុមហ៊ុនអាកាសចរណ៍ JAL អាចជម្លៀសចេញ បន្ទាប់ពីយន្តហោះនោះបានផ្ទុះនៅក្នុងអណ្តាតភ្លើងដ៏សន្ធោសន្ធៅ៕