​បាល់ទាត់៖ ខ្សែប្រយុទ្ធ​បារាំង Ousmane Dembele មិន​ត្រឹមតែ​ត្រូវ​អវត្តមាន​ពេញ​មួយ​ព្រឹត្តិការណ៍ Euro ២០២០ ដែល​នៅ​សល់​អោយ​ក្រុម​បារាំង​នោះ​ទេ​ ថែមទាំង​ត្រូវ​សម្រាក​យ៉ាង​ហោចណាស់ ៣​ខែ​ដោយ​សារ​របួស​ជង្គង់​។​

​​Dembele ត្រូវ​បាន​ផ្លាស់ប្ដូរ​ចូល​លេង​នៅ​វគ្គ​ទី​២ ក្នុង​ជំនួប​ដែល​បារាំង​ស្មើ​ជាមួយ​ហុង​គ្រី ១-១ កាលពី​ថ្ងៃ​សៅរ៍​តែ​ក៏​ត្រូវ​បាន​ផ្លាស់​ចេញ​វិញ​ក្រោយ​លេង​បាន ៣០​នាទី​។​ ​Dembele ត្រូវ​បាន​ក្រុម​គ្រូពេទ្យ​នៅ​ទីក្រុង Budapest ប្រទេស​ហុង​គ្រី​ថត​មើល​ពី​អាការៈ​របួស​របស់​គេ ហើយក៏​បាន​បញ្ជាក់​ដែរ​របួស​ជង្គង់​ទាមទារ​អោយ​មាន​ការវះកាត់ និង​ត្រូវ​សម្រាក​យ៉ាងហោចណាស់ ៣​ខែ​។ ​របួស​យូរ​បែបនេះ​ក៏​នឹង​ជះឥទ្ធិពល​ដល់ Barcelona ផង​ដែរ​ក្នុង​ការ​ចាប់ផ្ដើម​រដូវ​កាល​ថ្មី La Liga នៅ​ខែ​សីហា​ខាងមុខ​។

​​ចំណែក​បារាំង​នឹង​ត្រូវ​ជួប​ជាមួយ​ព័រទុយហ្កាល់​ក្នុង​ជំនួប​ចុងក្រោយ​ក្នុង​ពូ​ល F នៅ​ថ្ងៃ​ពុធ​នេះ​។ ​ក្រុម​របស់​លោក Didier Deschamps កំពុង​នាំ​មុខ​គេ​ក្នុង​ពូ​ល F នេះ​មាន ៤ពិន្ទុ​ស្មើគ្នា​ជាមួយ​អាល្លឺម៉ង់ ​តែ​នៅ​ឈរ​ពីលើ​ដោយ​សារ​បាន​យកឈ្នះ​អាល្លឺម៉ង់ ១-០ ខណៈ​ព័រទុយហ្កាល់​ឈរ​លេខ៣ មាន ៣ពិន្ទុ ឯ​ហុង​គ្រី​លេខ​៤ មាន ១​ពិន្ទុ​។ ​មិន​មាន​វត្តមាន Dembele ក៏​មិន​អី​ដែរ ក្រុម​បារាំង​នៅសល់​កីឡាករ​នៅ​តំបន់​ប្រយុទ្ធ​ជាច្រើន​ទៀត​ដូចជា Karim Benzema, Kylian Mbappe, Olivier Giroud, Kingsley Coman, Antoine Griezmann និង Wissam ben Yedder៕

​អត្ថបទ​៖​នាង សុភា​វុ​ធ