បាល់ទាត់៖ គិតមកដល់ពេលនេះគេរកឃើញ ១២ក្រុមហើយដែលកក់កៅអីនៅវគ្គ ១៦ក្រុមចុងក្រោយ Euro ២០២០ បន្ទាប់ពី ៣ក្រុមទៀតត្រូវបានរកឃើញពីពូល D យប់មិញ។
អង់គ្លេស ក្រូអាស៊ី និងឆេក ជា ៣ក្រុមទៀតដែលកក់កៅអីនៅវគ្គបន្ត បន្ទាប់ពីអង់គ្លេសយកឈ្នះឆេក ១-០ យប់មិញ ខណៈក្រូអាស៊ីយកឈ្នះស្កុតឡេន ៣-១ ធ្វើអោយក្រុមនៅក្នុងដែនដីចក្រភពអង់គ្លេស ស្កុតឡេនហាលអាវត្រឹមនេះ។ អង់គ្លេសបានយកឈ្នះឆេក ១-០ ដោយមួយគ្រាប់របស់ Raheem Sterling ធ្វើអោយក្រុមរបស់លោក Gareth Southgate មាន ៧ពិន្ទុឈរលើគេក្នុងពូល D មានន័យថានឹងត្រូវជួបជាមួយក្រុមលេខ២ ក្នុងពូល F មិនដឹងថាត្រូវជួបជាមួយបារាំង អាល្លឺម៉ង់ រឺព័រទុយហ្កាល់ឡើយនៅកីឡដ្ឋាន Wembley ថ្ងៃទី២៩ ខែមិថុនានេះ។
ចំណែកក្រូអាស៊ី ៣គ្រាប់យកឈ្នះស្កុតឡេនយប់មិញសំរេចដោយ Nikola Vlasic, Luka Modric និង Ivan Perisic ដែលធ្វើអោយក្រូអាស៊ីទទួលបាន ៣ពិន្ទុឡើងមកលេខ២ បន្តជួបជាមួយក្រុមលេខ២ ក្នុងពូល E ដែលមិនទាន់ប្រាកដថា ក្រុមណានៅឡើយរវាងអេស្ប៉ាញ ស៊ុយអែត ស្លូវ៉ាគី និងប៉ូឡូញ។ សូមបញ្ជាក់ថា គិតមកដល់ពេលនេះ ១២ក្រុមដែលកក់កៅអីនៅវគ្គ ១៦ក្រុមចុងក្រោយរួមមានអ៊ីតាលី វែល ស្វ៊ីស ប៊ែលហ្ស៊ិក ដាណឺម៉ាក ហូឡង់ អូទ្រីស អង់គ្លេស ក្រូអាស៊ី ឆេក ស៊ុយអែត និងបារាំង៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
