មជ្ឈមណ្ឌលសិក្សាទំនើប ជាគ្រឹះស្ថានអប់រំទំនើបផ្តោតលើទាំងភាសា និងបច្ចេកវិទ្យា ដែល​ចាប់​ផ្ដើម​តាំងពីថ្នាក់បឋមសិក្សា។ បច្ចុប្បន្ននេះ មជ្ឈមណ្ឌលសិក្សាទំនើបប្រមាណជិត ១០សាលា ត្រូវ​បានបង្កើតឡើងទូទាំងប្រទេស ដោយសាលានីមួយៗ មានបង្រៀនទាំងភាសាចិន ភាសាអង់គ្លេស កំព្យូទ័រ រ៉ូបូតទិក និងការសរសេរកូដជាដើម។

មជ្ឈមណ្ឌលសិក្សាទំនើប បច្ចុប្បន្នមានចំនួន ៧សាលាត្រូវបានបង្កើតឡើង និង​កំពុង​ដំណើរ​ការ​សិក្សា។ ៧មជ្ឈមណ្ឌលនេះ គឺមាននៅរាជធានីភ្នំពេញចំនួន ៦សាលា និងនៅខេត្តកំពង់ឆ្នាំង​ចំនួន ១សាលា។ សម្រាប់រាជធានីភ្នំពេញ មជ្ឈមណ្ឌលសិក្សាទំនើប មាននៅក្នុង​សាលាប​ឋម​សិក្សា​ព្រះនរោត្តម បឋមសិក្សាចតុមុខ បឋមសិក្សាកូលាប១ បឋមសិក្សាទួលគោក បឋម​សិក្សា​បាក់ទូក និងបឋមសិក្សាបឹងសាឡាង។ រីឯខេត្តកំពង់ឆ្នាំងវិញ គឺស្ថិតនៅបឋមសិក្សាគំរូក្រុង។

សម្រាប់​កម្មវិធីសិក្សាវិញ គឺសិក្សារយៈពេញមួយថ្ងៃ ទាំងពេលព្រឹក និងពេលរសៀល។ នេះ​ជា​ការ​លើក​ឡើងរបស់ ជ្រិន សាលី នាយកបឋមសិក្សាព្រះនរោត្តម ជាទីតាំងដែល​មាន​មជ្ឈ​មណ្ឌល​សិក្សា​ទំនើប តាំងពីឆ្នាំ ២០១៩មកម្លេះ។ លោកថាការសិក្សាសព្វថ្ងៃ សម្រាប់សិស្ស​នៅ​មជ្ឈមណ្ឌល​សិក្សាទំ​នើប ត្រូវសិក្សាកម្មវិធីសិក្សាជាតិមួយពេល និងត្រូវសិក្សាកម្ម​វិធី​សិក្សា​បន្ថែម​មួយ​ពេល​។ កម្មវិធីសិក្សាបន្ថែម រាប់បញ្ចូលទាំងការសិក្សាភាសាចិន ភាសាអង់គ្លេស កំព្យូទ័រ ការ​សរសេរ​កូដ និងរ៉ូបូតទិកជាដើម។

លោកបញ្ជាក់ថា សម្រាប់សិស្សគ្រប់រូបអាចដាក់ពាក្យ ចូលសិក្សានៅមជ្ឈមណ្ឌលសិក្សាទំនើប ឱ្យ​តែ​មាន​អាយុគ្រប់ចូលរៀន។ រីឯសិស្សសាលាដទៃ ក៏អាចចូល​មក​សិក្សា​នៅ​មជ្ឈ​មណ្ឌល​សិក្សា​ទំនើប​ផង​ដែរ សំខាន់ពួកគេត្រូវមានចំណេះដឹងភាសា ជាដើមទុនជាដើម។

សូមជម្រាបថា សម្រាប់ការសិក្សានៅមជ្ឈមណ្ឌលសិក្សាទំនើប ជាការសិក្សាបង់ថ្លៃ ពុំមែន​ជា​ការ​សិក្សា​ដោយ​មិនគិតថ្លៃដូចជា សាលារៀនសាធារណៈទូទៅនោះទេ៕ អត្ថបទ៖ គឹមហុក