ឯកឧត្តម គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានឱ្យដឹងថា ក្នុង​ឱកាស​​ទិវា​ជ័យជម្នះលើរបបប្រល័យពូជសាសន៍ ឆ្នាំ២០២៤ នេះ ទណ្ឌិត ២៤៥នាក់(ស្រី ២៨ នាក់) ត្រូវបាន​ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ទ្រង់សព្វ​ព្រះរាជ​ហឫទ័យ​ប្រោស​​ប្រទាន​ការ​បន្ធូរបន្ថយទោស តាមការក្រាបបង្គំទូលថ្វាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ឯកឧត្តម គឹម សន្តិភាព បន្ថែមថា ការបន្ធូរបន្ថយទោសដល់​ទណ្ឌិត​សម្រាប់​ទិវា​បុណ្យ​នេះ​មាន​បន្ថយ​ទោស​រយៈពេល ៣ ខែ ចំនួន ១៧៨ នាក់ បន្ថយទោសរយៈពេល ៦ ខែ ចំនួន ៥៧ នាក់ បន្ថយទោសរយៈពេល ៩ ខែ ចំនួន ០៨ នាក់ បន្ថយទោសរយៈពេល ១២ ខែ ចំនួនម្នាក់ បន្ថយទោសមួយជីវិតមកនៅត្រឹម ៣០ឆ្នាំ ចំនួនម្នាក់ និងមិនមានការលើកលែងទោសនោះទេ។

ជាមួយគ្នានេះ ឯកឧត្តម គឹម សន្តិភាព បានបញ្ជាក់ជាថ្មីថា គណៈកម្មការជាតិ​ពុំ​លើក​យក​មក​ពិនិត្យ​ពិចារណា​នោះឡើយ ចំពោះសំណើ​ទាំង​ឡាយ​ណា​ទាក់​ទង​នឹង​ទណ្ឌិត​ដែល​បាន​ប្រព្រឹត្ត​អំពើមួ​យចំនួនដូចជា ចំពោះបទល្មើសទូទៅ មានបទឧក្រិដ្ឋជនគ្រឿងញៀន អំពើសាហាវ​យង់ឃ្នង ករណីមិនរាងចាល ប្រព្រឹត្តលើជនរងគ្រោះដែលជាសាច់ញាតិ ឬសហព័ទ្ធ ប្រព្រឹត្ត​លើ​ជន​រង​គ្រោះជាមន្ត្រីរាជការ ឬមន្ត្រីសាធារណៈ និងទណ្ឌិតធ្លាប់​ទទួល​បាន​ការ​បន្ធូរ​បន្ថយ​ទោស​ម្តង​រួច​មក​ហើយ។ ចំពោះបទល្មើសរំលោភផ្លូវភេទ ដែលមានជនរងគ្រោះ​ជាអនីតិជន​អាយុ​ក្រោម​១៤ឆ្នាំ ជនរងគ្រោះជាជនមានវិបល្លាសស្មារតី ឬពិការ ជនរងគ្រោះជាសាច់សាលោហិត ករណី​រំលោភ​បូក និងករណីប៉ុនប៉ង ឬបៀតបៀនកេរ្តិ៍ខ្មាសលើជនរងគ្រោះជាសាច់សាលោហិត៕ អត្ថបទ ៖ ប្រាក់ វ៉ាន់ដា