ក្រុមនគរបាលនិយាយថា នគរបាលយ៉ាងហោច ៥នាក់ ត្រូវបានសម្លាប់ និងមនុស្សប្រហែល ២០នាក់ បានរងរបួសក្នុងហេតុការណ៍ផ្ទុះគ្រាប់បែកនៅជិតរថយន្តនគរបាលនៅស្រុក Bajaur ស្ថិតក្នុងខេត្តភាគពាយ័ព្យ Khyber Pakhtunkhwa ប្រទេសប៉ាគីស្ថាន នាថ្ងៃចន្ទនេះ ។

វីដេអូដែលបញ្ចេញដោយក្រុមជួយសង្រ្គោះស្រុក Bajaur នៅលើបណ្តាញព័ត៌មានសង្គម Facebook ឃើញរថយន្តគិលានសង្រ្គោះ និងក្រុមជួយសង្រ្គោះនៅក្រៅមន្ទីរពេទ្យ ។ ទីភ្នាក់ងារព័ត៌មានរ៉យទ័រ អាចបញ្ជាក់បានពីទីតាំងមន្ទីរពេទ្យពីអគារនៅក្បែរនោះដោយផ្គូរផ្គងជាមួយរូបភាពផ្កាយរណប ប៉ុន្តែពួកគេពុំអាចបញ្ជាក់ផ្ទៀងផ្ទាត់ដោយឯករាជ្យពីពេលវេលានៃការថតវីដែអូនេះបាននោះឡើយ ។

លោក Kashif Zulfiqar គឺជាមន្រ្តីនគរបាលស្រុក Bajaur និយាយថា រថយន្តនគរបាល បានធ្វើដំណើរតាមផ្លូវដើម្បីផ្តល់សន្តិសុខជូនក្រុមចាក់ថ្នាំបង្ការជំងឺស្វិតដៃជើងនៅតំបន់ Mamund Tehsil ស្ថិតក្នុងស្រុក Bajaur ។

លោកបន្តថា អ្នករងរបួសត្រូវបានបញ្ជូនទៅកាន់មន្ទីរពេទ្យបង្អែក ហើយអ្នករងរបួសធ្ងន់ធ្ងរ ៣-៤នាក់ ត្រូវបានបញ្ជូនទៅកាន់មន្ទីរពេទ្យនៅទីក្រុង Peshawar ។

ដោយឡែក ក្រុមតាលីបង់ប៉ាគីស្ថាន បានប្រកាសទទួលស្គាល់ការបំផ្ទុះគ្រាប់បែកនេះ នៅក្នុងសេចក្តីថ្លែងការណ៍ ៕