យានចុះចតផលិតឡើងដោយក្រុមហ៊ុនឯកជនអាមេរិក ត្រូវបានបញ្ជូនទៅកាន់ឋានព្រះច័ន្ទនៅថ្ងៃចន្ទនេះ ក្នុងការព្យាយាមចុះចតលើឋានព្រះច័ន្ទជាលើកដំបូងរបស់សហរដ្ឋអាមេរិកក្នុងរយៈពេលកន្លះសតវត្សរ៍កន្លងមកនេះ ក្រោយបាញ់បង្ហោះទៅកាន់ទីអវកាសនៅលើយានចម្លងប្រភេទថ្មី Vulcan ដែលផលិតឡើងលើកដំបូងដោយក្រុមហ៊ុនចម្រុះរបស់ក្រុមហ៊ុន Boeing និងក្រុមហ៊ុន Lockheed Martin ។

 យានចុះចតឋានព្រះច័ន្ទ Peregrine របស់ក្រុមហ៊ុនអវកាស Astrobotic ត្រូវបានបាញ់ទៅកាន់ទីអវកាសកាលពីវេលាម៉ោង ២ និង ១៨នាទី យប់រំលងអាធ្រាត្រ ចេញពីទីក្រុង Cape Canaveral រដ្ឋ Florida លើការហោះហើរលើកដំបូងរបស់យានចម្លង Vulcan គឺជារ៉ុក្កែតដ៏មានថាមពលដែលស្ថិតក្រោមការផលិតអស់រយៈពេល ១ទសវត្សរ៍ដោយក្រុមហ៊ុនចម្រុះ United Launch Alliance (ULA)របស់ក្រុមហ៊ុន Boeing និងក្រុមហ៊ុន Lockheed Martin ។

 បើសិនជាអ្វីៗទាំងអស់ដំណើរការទៅល្អ យានចុះចត Peregrine នឹងក្លាយជាការចុះចតលើឋានព្រះច័ន្ទលើកដំបូងរបស់សហរដ្ឋអាមេរិក ចាប់តាំងពីការចុះចតចុងក្រោយគេបង្អស់របស់យានអវកាស Apollo កាលពីឆ្នាំ ១៩៧២ ហើយនិងក្លាយជាការចុះចតឋានព្រះច័ន្ទជាលើកដំបូងពុំធ្លាប់ដែលមានដោយក្រុមហ៊ុនឯកជន ។

 ការបាញ់បង្ហោះនេះដែរ គឺជាការសំខាន់លើកដំបូងសម្រាប់ក្រុមហ៊ុន ULA ដែលបានផលិតយានចម្លង Vulcan ដើម្បីជំនួសរ៉ុក្កែត Atlas V និងដើម្បីប្រកួតប្រជែងរ៉ុក្កែតអាចប្រើឡើងវិញ Falcon 9 ពីក្រុមហ៊ុន SpaceX របស់លោក Elon Musk នៅក្នុងទីផ្សារបាញ់បង្ហោះផ្កាយរណប ៕