កម្មវិធីធ្វើដំណើរដ៏ធំបំផុតមួយរបស់ប្រទេសឥណ្ឌា បានផ្អាកការកក់ជើងហោះហើរទៅកាន់ប្រទេសម៉ាល់ឌីវ ដែលពឹងផ្អែកលើវិស័យទេសចរណ៍ នៅថ្ងៃចន្ទ (ទី៨ ខែមករា) នេះ បន្ទាប់ពីមានការចំអកតាមរយៈការបង្ហោះតាមបណ្ដាញសង្គម ប្រឆាំងនឹងនាយករដ្ឋមន្ត្រីឥណ្ឌា លោក Narendra Modi ដែលធ្វើឲ្យអាប់អួដល់ទំនាក់ទំនង រវាងប្រទេសជិតខាងអាស៊ីខាងត្បូងទាំង២។

ប្រទេសឥណ្ឌា និងរុស្សី មានចំនួនអ្នកទេសចរច្រើនជាងគេ ក្នុងការទៅលេងប្រទេសម៉ាល់ឌីវ ដែលជាការតជាប់គ្នានៃប្រជុំកោះដែលមានពន្លឺព្រះអាទិត្យដ៏ស្រស់ស្អាត នៅក្នុងមហាសមុទ្រឥណ្ឌា ដែលជាកន្លែងសម្រាប់រមណីយដ្ឋានប្រណីតជាច្រើន។ យោងតាមធនាគារពិភពលោកបានឲ្យដឹងថា វិស័យទេសចរណ៍មានស្ទើរតែមួយភាគបីនៃសេដ្ឋកិច្ចរបស់ប្រទេសនេះ។

សហស្ថាបនិក និងជានាយកប្រតិបត្តិរបស់ក្រុមហ៊ុន EaseMyTrip លោក Prashant Pitti បាននិយាយថា ការកក់សំបុត្រទៅម៉ាល់ឌីវត្រូវបានផ្អាក «ដោយគ្មានកំណត់»។

ទោះបីជាទីក្រុង New Delhi និងទីក្រុង Male មានទំនាក់ទំនងយ៉ាងជិតស្និទ្ធជាយូរអង្វែងណាស់មកហើយក៏ដោយ ក៏ទំនាក់ទំនងចាប់ផ្ដើមតានតឹង តាំងពីប្រធានាធិបតី លោក Mohamed Muizzu ឡើងកាន់អំណាច ក្នុងខែវិច្ឆិកា ដែលឈ្នះការបោះឆ្នោត ជាមួយនឹងយុទ្ធនាការ «India Out» (ឥណ្ឌាចេញ)។

ភាពចម្រូងចម្រាសលើការអត្ថាធិប្បាយពាក់ព័ន្ធនឹងលោក Modi ពីសំណាក់រដ្ឋមន្ត្រីម៉ាល់ឌីវ ៣នាក់ ដែលឥឡូវនេះកំពុងត្រូវបានព្យួរការងារ បានកើតឡើងស្របពេលដែលលោក Muizzu ចាប់ផ្តើមដំណើរទស្សនកិច្ចផ្លូវរដ្ឋជាលើកដំបូងរបស់លោក នៅប្រទេសចិន ចាប់ពីថ្ងៃទី ៨-១២ ខែមករា ដោយងាកចេញពីទម្លាប់របស់មេដឹកនាំម៉ាល់ឌីវភាគច្រើន ដែលជ្រើសរើសទីក្រុង New Delhi ធ្វើជាកន្លែងសំចតដំបូង ក្រោយជាប់ឆ្នោត៕