អ្នកនាំពាក្យកងកម្លាំងការពារអ៊ីស្រាអែល (IDF) លោក ដានីញ៉ែល ហាហ្ការី (Daniel Hagari) បាននិយាយកាលពីថ្ងៃចន្ទ (០៨ មករា) ថាកងទ័ពអ៊ីស្រាអែល បានចាប់ផ្តើមដំណាក់កាលថ្មី និងមិនសូវខ្លាំងក្លានៅក្នុងប្រតិបត្តិការយោធារបស់ខ្លួនប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប។

លោក ហាហ្ការី ត្រូវបានដកស្រង់សម្តីដោយសារព័ត៌មាន ញ៉ូវយ៉ក ថែមស៍ (New York Times) ដោយបាននិយាយថា ពេលនេះ កងកម្លាំងការពារអ៊ីស្រាអែល ងាកទៅ «ធ្វើការវាយឆ្មក់តែម្តងនៅទីនោះ ជំនួសឱ្យការធ្វើសមយុទ្ធទ្រង់ទ្រាយធំ» ហើយសង្គ្រាមបានផ្លាស់ប្តូរដំណាក់កាលមួយ។

លោក ហាហ្ការី បានបន្ថែមថា អ៊ីស្រាអែលឥឡូវនេះនឹងផ្តោតលើការប្រយុទ្ធប្រឆាំងនឹងក្រុមហាម៉ាសនៅភាគកណ្តាល និងភាគខាងត្បូងតំបន់ហ្កាហ្សា ជាពិសេសនៅជុំវិញទីក្រុង ខាន់ យ៉ូនីស (Khan Younis) និងទីក្រុង ឌែរ អាល់បាឡាហ៍ (Deir al-Balah) ខណៈពេលដែលកាត់បន្ថយចំនួនទាហានរបស់ខ្លួននៅក្នុងតំបន់ហ្កាហ្សា។

អ្នកនាំពាក្យរូបនេះក៏បានប្តេជ្ញាថា ជំនួយមនុស្សធម៌បន្ថែមទៀតនឹងត្រូវបានបញ្ជូនទៅកាន់តំបន់ហ្កាហ្សា។ ការលើកឡើងនេះបានធ្វើឡើងបន្ទាប់ពីរដ្ឋមន្ត្រីការពារជាតិអ៊ីស្រាអែលលោក យ៉ាវ ហ្កាឡាន់ (Yoav Gallant) បានប្រាប់សារព័ត៌មាន វ៉លស្រ្ទីតជើណល់ (Wall Street Journal) ថាកងកម្លាំងអ៊ីស្រាអែលនឹងចាប់ផ្តើមជំពូកថ្មីនៃជម្លោះដែល «នឹងមានរយៈពេលយូរជាងនេះ»៕