អង្គការ ណាសា (NASA) គ្រោងនឹងពន្យារពេលបេសកកម្មបន្ទាប់មួយចំនួនរបស់ខ្លួនទៅកាន់ឋានព្រះច័ន្ទ ក្រោមកម្មវិធីសំខាន់មួយ ខណៈដែលឧបសគ្គបច្ចេកទេសកើតឡើងជាមួយនឹងយានអវកាសផ្សេងៗ ដែលខ្លួនមានបំណងប្រើប្រាស់ដើម្បីទៅដល់ទីនោះ នេះបើយោងតាមមនុស្សបួននាក់ដែលដឹងពីគម្រោងរបស់អង្គការ ណាសា។

ទីភ្នាក់ងារអវកាសអាមេរិក នេះត្រូវបានគេរំពឹងថានឹងប្រកាសផែនការអវកាសខ្លួននៅថ្ងៃអង្គារ (០៩ មករា) នេះបន្ទាប់ពីចំណាយពេលជាច្រើនខែក្នុងការតាមដានវឌ្ឍនភាពជាមួយអ្នកម៉ៅការ និងពិចារណាលើការផ្លាស់ប្តូរកម្មវិធី អាតេមីស (Artemis) ដែលជាកិច្ចខិតខំប្រឹងប្រែងរាប់ពាន់លានដុល្លារ ដែលរួមបញ្ចូលការបញ្ជូនអវកាសយានិកដំបូងទៅកាន់ឋានព្រះច័ន្ទ ចាប់តាំងពីបេសកកម្មអាប៉ូឡូចុងក្រោយក្នុងឆ្នាំ១៩៧២។

មនុស្សពីរនាក់ដែលដឹងពីបញ្ហានេះបាននិយាយថា បេសកកម្ម អាតេមីស ទីពីររបស់អង្គការណាសា ត្រូវបានគេរំពឹងថា នឹងត្រូវបានរុញច្រានលើសពីគោលដៅដែលបានគ្រោងទុកនៅចុងឆ្នាំ២០២៤ បន្ទាប់ពីបញ្ហាត្រូវបានរកឃើញជាមួយនឹងថ្មអាគុយរបស់យានអវកាស ដែលផលិតដោយក្រុមហ៊ុន ឡុកហីត ម៉ាទីន (Lockheed Martin) អំឡុងពេលធ្វើតេស្តរំញ័រ។

នេះនឹងក្លាយជាការហោះហើរលើកដំបូងដោយមានមនុស្សនៅលើយាន បន្ទាប់ពីបានបាញ់បង្ហោះយានអវកាសដែលមិនមានមនុស្សបើកនៅលើប្រព័ន្ធបង្ហោះយានអវកាសរបស់អង្គការណាសា ក្នុងការសាកល្បងដំបូងក្នុងឆ្នាំ២០២២។ បេសកកម្ម អាតេមីស ៣ (Artemis 3) ដែលគ្រោងនឹងក្លាយជាបេសកកម្មដំបូងគេដែលចុះចតដោយមនុស្សនៅលើឋានព្រះច័ន្ទនៅចុងឆ្នាំ២០២៥ ដោយប្រើប្រព័ន្ធចុះចតអវកាសស្តារស៊ីប ពីក្រុមហ៊ុនម៉ៅការ ស្ពេសអ៊ិច (SpaceX) របស់អង្គការណាសា ក៏នឹងត្រូវរុញទៅមុខផងដែរ៕