ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃអង្គារ ទី៩ ខែមករា ឆ្នាំ​២០២៤នេះ បានដឹកនាំសហការី រាយការណ៍ពីវឌ្ឍនភាពរបស់ក្រសួងស្តីពីវិស័យការងារ សន្តិសុខ​សង្គម និងបណ្តុះបណ្តាលវិជ្ជាជីវៈ ជូនគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទាការងារ បណ្តុះបណ្តាលវិជ្ជាជីវៈ និង​កិច្ចការ​នារី ​នៃ​រដ្ឋសភា ​ដែល​ដឹកនាំ​ដោយ​លោកជំទាវ ឡោក ខេង ប្រធានគណៈកម្មការទី៨ នៅវិមានរដ្ឋសភា។

ឯកឧត្តមរដ្ឋមន្ត្រី បានរាយការណ៍ពីលទ្ធផល នៃ​អនុសាសន៍​ទាំង​១០​ចំណុច​របស់​សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដែលបានដាក់ឱ្យក្រសួងការងារ និង​បណ្តុះបណ្តាលវិជ្ជាជីវៈតាំងពីដើមអាណត្តិទី៧។ ក្នុងនោះ ឯកឧត្តមរដ្ឋមន្ត្រី​បាន​រាយការណ៍​ពី​លទ្ធផល នៃ​អនុសាសន៍​៦ ចំណុច ដែល​ក្រសួង​បាន​អនុវត្ត​គ្រប់ជ្រុង​ជ្រោយ​នៅ​មុន​បំណាច់​ឆ្នាំ​២០២៣ និងអនុសាសន៍៤ចំណុចដែលនឹងត្រូវធ្វើបន្តតាមផែនការដែលបានដាក់។

ក្រោយបានស្តាប់សេចក្តីរាយការណ៍ លោកជំទាវ ប្រធានគណៈកម្មការ បាន​វាយ​តម្លៃ​ខ្ពស់​ចំពោះ​លទ្ធផល និងកោតសរសើរចំពោះវឌ្ឍនភាពគួរឱ្យកត់សម្គាល់សម្រាប់វិស័យការងារ សន្តិសុខ​សង្គម និងបណ្តុះបណ្តាលវិជ្ជាជីវៈដែលបានសម្រេចយ៉ាងច្រើនក្នុងដើមអាណត្តិទី៧នេះ៕