ទីបញ្ជាការកណ្តាលរបស់យោធាសហរដ្ឋអាមេរិកបាននិយាយថា កងកម្លាំងសហរដ្ឋអាមេរិក និងចក្រភពអង់គ្លេសបានបាញ់ទម្លាក់យានដ្រូន និងមីស៊ីលចំនួន ២១គ្រឿងដែលបាញ់ដោយក្រុមឧទ្ទាមហ៊ូទី (Houthis) ដែលមានមូលដ្ឋាននៅយេម៉ែន កាលពីថ្ងៃអង្គារ (០៩ មករា) ចូលទៅក្នុងសមុទ្រក្រហមភាគខាងត្បូងឆ្ពោះទៅកាន់ផ្លូវដឹកជញ្ជូនអន្តរជាតិ។

ទីបញ្ជាការកណ្តាលអាមេរិកនេះបាននិយាយថា មិនមានការរាយការណ៍ពីការរងរបួស ឬការខូចខាតនោះទេ ដោយបន្ថែមថា នេះគឺជាការវាយប្រហារលើកទី២៦ របស់ក្រុមហ៊ូទី លើផ្លូវដឹកជញ្ជូនពាណិជ្ជកម្មនៅសមុទ្រក្រហម ចាប់តាំងពីថ្ងៃទី១៩ ខែវិច្ឆិកាមក។

ក្រុមសកម្មប្រយុទ្ធហ៊ូទី ដែលគាំទ្រដោយអ៊ីរ៉ង់ បានបង្កើនការវាយប្រហារលើនាវាពាណិជ្ជកម្មនៅសមុទ្រក្រហម ដើម្បីតវ៉ាប្រឆាំងនឹងសង្គ្រាមរបស់អ៊ីស្រាអែលនៅតំបន់ហ្កាហ្សា។ ខ្សែដឹកជញ្ជូនជាច្រើនបានផ្អាកប្រតិបត្តិការ ជំនួសឱ្យការធ្វើដំណើរដ៏វែងឆ្ងាយជុំវិញទ្វីបអាហ្រ្វិក។

ក្រុមហ៊ូទី បានប្តេជ្ញាបន្តការវាយប្រហាររហូតដល់អ៊ីស្រាអែលបញ្ឈប់ជម្លោះនៅតំបន់ហ្កាហ្សា ហើយបានព្រមានថា ខ្លួននឹងវាយប្រហារលើនាវាចម្បាំងរបស់សហរដ្ឋអាមេរិក ប្រសិនបើក្រុមជីវពលខ្លួនត្រូវកំណត់ជាគោលដៅ។ ទីបញ្ជាការអាមេរិកនេះបាននិយាយថា យានដ្រូនចំនួន ១៨គ្រឿង មីស៊ីលតម្រង់គោលដៅប្រឆាំងនាវាចំនួន ២គ្រាប់ និងមីស៊ីលបាលិស្ទិកប្រឆាំងនាវាចំនួនមួយគ្រាប់ ត្រូវបានបាញ់ទម្លាក់ដោយកងកម្លាំងសហរដ្ឋអាមេរិក និងអង់គ្លេស៕