បន្ទាយមានជ័យ៖ កម្លាំងនគរបាលការិយាល័យ ប្រឆាំងការជួញដូរមនុស្ស និងការពារអនីតិជនចាប់ឃាត់ខ្លួនមេខ្យល់ចំនួន ០៣នាក់ ពាក់ព័ន្ធករណីនាំមនុស្សឆ្លងដោយខុសច្បាប់បញ្ជូនទៅសាលាដំបូងខេត្តបន្ទាយមានជ័យ។
ជាមួយគ្នានោះដែរ លោកវរសេនីយ៍ទោ បោន ស៊ីហា អធិការក្រុងប៉ោយប៉ែតស្តីទី បានបញ្ជាក់ឲ្យដឹងថា មេខ្សល់ចំនួន ០៦នាក់ ក្នុងនោះ អ្នកពាក់ព័ន្ធចំនួន ០៣នាក់សរុបទាំងអស់ចំនួន ១២នាក់ ត្រូវបានកម្លាំងនគរបាលវរសេនាតូចការពារព្រំដែនគោកលេខ៩១១ ធ្វើការឃាត់ខ្លួនបាននៅចំណុចអូរព្រំដែននៅវេលាម៉ោង ០៣និង៤៥នាទីរសៀលថ្ងៃទី២០ ខែមិថុនា ឆ្នាំ២០២១ ដោយក្នុងនោះ ដកហូតវត្ថុតាងរួមមានទូរស័ព្ទដៃ ០៦គ្រឿង ផាស្អាប់ ០១គ្រឿងនិងម៉ូតូ ២គ្រឿង។
លោកវរសេនីយ៍ទោ បានបន្តថា មេខ្យល់ទាំង ០៦នាក់ ដែលឃាត់ខ្លួនបាននៅចំណុចអូរព្រំដែននោះរួមមាន១.ឈ្មោះសុខា រ៉ាវុធ ភេទប្រុស អាយុ ២០ឆ្នាំ ស្នាក់នៅភូមិបាលិលេយ្យ សង្កាត់ក្រុងប៉ោយប៉ែត ២.ឈ្មោះខេមរា សូរ៉ាវីត ហៅម៉ៅ ភេទប្រុស អាយុ៣២ឆ្នាំ ស្នាក់នៅភូមិក្បាលស្ពាន២ សង្កាត់ក្រុងប៉ោយប៉ែត ៣.ឈ្មោះលី វ៉ន ភេទប្រុស អាយុ ១៧ឆ្នាំ ស្នាក់នៅភូមិព្រៃព្រិច សង្កាត់ ក្រុងប៉ោយប៉ែត ៤.ឈ្មោះ ជីង ហៅ ណាន ភេទប្រុស អាយុ ១៧ឆ្នាំ ស្នាក់នៅភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត ៥.ឈ្មោះប៉ែន ឆៃណាម ភេទប្រុស អាយុ ១៨ឆ្នាំ ស្នាក់នៅភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត និង៦.ឈ្មោះ យួម សឿម ភេទប្រុសអាយុ ៣៥ឆ្នាំ នៅភូមិសាមគ្គីមានជ័យ សង្កាត់/ក្រុងប៉ោយប៉ែត ក្នុងចំណោម ០៦នាកនោះ មាន ០៣នាក់ ជាអ្នកពាក់ព័ន្ធក្នុងការដឹកជញ្ជូនពលករដើម្បីឆ្លងដែន។
យ៉ាងណាម៉ិញលោកស្រីវរសេនីយ៍ត្រី ឌី សុជាតិ ស្នងការរងទទួលផែនការងារ នគរបាលប្រឆាំងការជួញដូរមនុស្សនិងការពារអនីតិជន បានឲ្យដឹងថា មេខ្យល់ចំនួន ០៣នាក់ និងអ្នកពាក់ព័ន្ធចំនួន៣នាក់ ត្រូវបានកម្លាំងនគរបាលជំនាញការិយាល័យប្រឆាំងការជួញដូរមនុស្សនិងការពារអនីតិជន បញ្ជូនខ្លួនទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់រីឯប្រជាពលរដ្ឋទាំង ០៦នាក់ផ្សេងទៀត ត្រូវបានបញ្ជូនទៅធ្វើចត្តាឡីស័ក នៅវិទ្យាល័យនិមិត្ត ក្នុងសង្កាត់និមិត្ត ក្រុងប៉ោយ។ ដោយឡែកជនជាតិថៃចំនួន ០៥នាក់ផ្សេងទៀត ក្នុងនោះ ស្រីម្នាក់ដែលសមត្ថកិច្ចឃាតចាប់ខ្លួនបាន កាលពីថ្ងៃទី២២មិថុនា ឆ្នាំ២០២១ ពីបទករណីលួចឆ្លងដែនខុសច្បាប់ចូលមករកការងារធ្វើលើទឹកដីខ្មែរនោះ ត្រូវបានកម្លាំងជំនាញបញ្ជូនប្រគល់ឲ្យទៅភាគីថៃវិញផងដែរ។
គួររំលឹកថា កន្លងមកអាជ្ញាធរខេត្ត ក៏ដូចជាកម្លាំងជំនាញសមត្ថកិច្ច បានធ្វើការទប់ស្កាត់យ៉ាងតឹងរឹងនៅតាមខ្សែរបន្ទាត់ព្រំដែននឹងតាមច្រករបៀងផ្សេងៗយ៉ាងណាក្តី ប៉ុន្តែនៅតែមានក្រុមមេខ្យល់ខិលខូចមួយចំនួនតូចនៅតែលបលួចបន្តធ្វើសកម្មភាពដឹកនាំពលករឆ្លងដែនខុសច្បាប់ដោយមិនមានការកោតញញើតនោះឡើយ ក្នុងភូមិសាស្ត្រក្រុងប៉ោយប៉ែតខេត្តបន្ទាយមានជ័យនោះ៕ អត្ថបទ៖ ឃិន សារិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
