ភ្នំពេញ ៖ ​នាទីសី្តការក្រសួង រសៀលថ្ងៃទី២៣ ខែមិថុនា ឆ្នាំ២០២១នេះ បានរៀបចំពិធីប្រគល់-ទទួលជំនួយរបស់អង្គការសុខភាពពិភពលោក ជូនរាជរដ្ឋាភិបាលកម្ពុជា ដើម្បីប្រើបា្រស់ក្នុងការការពារ ទប់ស្កាត់ និងឆ្លើយតបការរាតត្បាតជំងឺកូវីដ១៩ ក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល រួមជាមួយលោកស្រី វេជ្ជបណ្ឌិត លី អាយឡែន តំណាងអង្គការសុខភាពពិភពលោក ប្រចាំកម្ពុជា។

​អំណោយប្រគល់ជូននាពេលនេះ ជាជំនួយឧបករណ៍សម្ភារៈបរិក្ខារវេជ្ជសាស្រ្ត រួមមាន៖ ម៉ាស N95 ចំនួន៧០.០០០ម៉ាស, ម៉ាស៊ីនជំនួយដកដង្ហើម ចំនួន៣៦០គ្រឿង, ឱសថ Dexamethasone ចំនួន១៩.០០០ប្រអប់ និងម៉ាស៊ីនភ្លើង ចំនួន២៥គ្រឿង ដែលសរុបជាទឹកប្រាក់ចំនួន៦៥៨,០០០ដុល្លារអាមេរិក។

 ឯកឧត្តម សាស្រ្តាចារ្យ ម៉ម ប៊ុនហេង បានសម្តែងអំណរគុណយ៉ាងជ្រាលជ្រៅ ជូនចំពោះអង្គការសុខភាពពិភពលោកទាំងការិយាល័យនៅប្រទេសកម្ពុជា និងការិយាល័យប្រចាំតំបន់ប៉ាស៊ីហ្វិកខាងលិច ដែលតែងតែជួយឧបត្ថម្ភគាំទ្រថវិកា និងបច្ចេកទេសដល់វិស័យសុខាភិបាលកម្ពុជា ដែលសបញ្ជាក់ពីការយកចិត្តទុកដាក់ខ្ពស់របស់អង្គការសុខភាពពិភពលោក ចំពោះរាជរដ្ឋាភិបាល និងប្រជាជនកម្ពុជា ជាពិសេសក្នុងកាលៈទេសៈបច្ចុប្បន្ន ដែលយើងបាននិងកំពុងខិតខំប្រឹងប្រែងរួមគ្នា ដើម្បីជំរុញវិធានការការពារ ទប់ស្កាត់ និងឆ្លើយតបការរាតត្បាតនៃវីរុសកូវីដ-១៩ ឲ្យបានកាន់តែឆាប់រហ័ស៕អត្ថបទ ៖ រដ្ឋា