មនុស្សរាប់សែននាក់បានប្រឈមនឹងការលុបចោលការធ្វើដំណើរតាមរថភ្លើង នៅទូទាំងប្រទេសអាល្លឺម៉ង់ ចាប់ពីថ្ងៃពុធ (ទី១០ ខែមករា) នេះ ខណៈដែលការធ្វើកូដកម្មផ្លូវដែកទូទាំងប្រទេសរយៈពេល ៣ថ្ងៃ បានបន្ថែមភាពវឹកវរនៃការធ្វើដំណើរនៅក្នុងប្រទេសសេដ្ឋកិច្ចដ៏ធំបំផុតជាងគេរបស់តំបន់អឺរ៉ុប ស្របពេលការតវ៉ារបស់កសិករដែលកំពុងបន្តមាន ក៏បានធ្វើឲ្យចរាចរណ៍ផ្លូវថ្នល់មានការរំខានផងដែរ ក្នុងប្រទេសនេះ។

សហជីពរបស់អ្នកបើករថភ្លើង GDL បានចាប់ផ្តើមកូដកម្មដ៏ធំរបស់ខ្លួន នៅព្រឹកព្រលឹមថ្ងៃពុធនេះ ដោយមានការចូលរួមពីអ្នកបើករថភ្លើងដឹកទំនិញ ដែលបានឈប់ធ្វើការកាលពីល្ងាចថ្ងៃអង្គារ (ទី៩ ខែមករា)។ កូដកម្មនេះនឹងបន្តរហូតដល់ល្ងាចថ្ងៃសុក្រ (ទី១២ ខែមករា) ដែលធ្វើឲ្យប្រតិបត្តិករផ្លូវដែកជាតិ Deutsche Bahn ដំណើរការតែតារាងពេលវេលាសង្គ្រោះបន្ទាន់ ដែលចាំបាច់ប៉ុណ្ណោះ។

នៅស្ថានីយកណ្តាល នាទីក្រុងប៊ែរឡាំង ដែលមិនមានមនុស្សកកកុញដូចធម្មតានោះ អ្នកនាំពាក្យរបស់ប្រតិបត្តិករ Deutsche Bahn បានប្រាប់អ្នកសារព័ត៌មានថា៖ «សេវារថភ្លើងល្បឿនលឿនមួយ ក្នុងចំណោមសេវាផ្លូវឆ្ងាយចំនួន៥ កំពុងដំណើរការ ហើយសេវាកម្មក្នុងតំបន់ត្រូវបាន កាត់បន្ថយយ៉ាងខ្លាំង»។

ជម្លោះដ៏រ៉ាំរ៉ៃលើបញ្ហាប្រាក់ឈ្នួល និងម៉ោងធ្វើការរបស់អ្នកបើករថភ្លើងបានកើតឡើងម្តងទៀត បន្ទាប់ពីផ្អាករយៈពេល ៣សប្តាហ៍ នៅថ្ងៃបុណ្យណូអែល និងបន្ទាប់ពីការប្រឹងប្រែងដោយប្រតិបត្តិករ Deutsche Bahn ដើម្បីទប់ស្កាត់កូដកម្មចុងក្រោយបង្អស់ដោយប្រើប្រាស់ដីការបស់តុលាការ មិនទទួលបានផល៕