រាជរដ្ឋាភិបាលកម្ពុជា បានសម្រេចកែសម្រួលថវិកាឧបត្ថម្ភជូនគ្រួសារក្រីក្រ និង​ងាយរង​គ្រោះ​កំឡុង​ពេលប្រយុទ្ធប្រឆាំងកូវីដ-១៩។ នេះបើយោងតាមអនុក្រឹត្យ ដែលបានចុះកាលពីថ្ងៃទី ២៩ ខែធ្នូ ឆ្នាំ២០២៣។ ការកែប្រែនេះ គឺចាប់ផ្ដើមអនុវត្តនៅខែ មករា ខែកុម្ភៈ និងខែ មីនា ឆ្នាំ ២០២៤។

រាជរដ្ឋាភិបាលកម្ពុជា បានសម្រេចកែសម្រួលថវិកា ឧបត្ថម្ភជូនគ្រួសារក្រីក្រ និង​ងាយរង​គ្រោះ​កំឡុង​ពេល​ប្រយុទ្ធប្រឆាំងកូវីដ-១៩ ដែលបានអនុវត្តតាំងពីឆ្នាំ ២០២០មកម្លេះ។ ការកែសម្រួល គឺ​អនុវត្តរយៈពេល ៣ ខែ ដោយចាប់ផ្ដើមពីខែ មករា ដល់ខែ មីនា ឆ្នាំ ២០២៤ ដើម្បី​ឈាន​ទៅ​អនុវត្ត​កម្ម​វិធីជំនួយសង្គមក្នុងក្របខណ្ឌកញ្ចប់គ្រួសារ ចាប់ពីខែមេសា ខាងមុខតទៅ។ 

ការ​កែ​សម្រួលថវិកាឧបត្ថម្ភនេះ បែងចែកជា ៣ផ្នែកធំៗ ដោយផ្អែកលើទីតំបន់ដែល គ្រួសារ​ក្រីក្រ​គោល​ដៅរ​ស់នៅ។ ផ្នែកទី ១ គឺសំដៅលើគ្រួសារក្រីក្រ និងងាយរង​គ្រោះ​រស់​នៅទីប្រជុំ​ជន​ក្នុង​រាជ​ធានី​ភ្នំពេញ។ ក្នុងចំណុចនេះ បានកំណត់ថា គ្រួសារមានបណ្ណក្រីក្រ ប្រភេទ១ និងប្រភេទ ២ ទទួល​បាន ១២ម៉ឺនរៀលដូចគ្នា។

ចំពោះ​កុមារអាយុ ០-៥ឆ្នាំ ជនមានពិការភាព មនុស្សចាស់អាយុចាប់ពី ៦០ឆ្នាំឡើងទៅ និង​សមាជិក​ដែល​មានផ្ទុកមេរោគអេដស៍ ទទួលបាន ៤ម៉ឺនរៀលក្នុងមួយនាក់ សម្រាប់ក្រីក្រ ១។ រីឯ កុមារ​អាយុ ០-៥ឆ្នាំ ជនមានពិការភាព មនុស្សចាស់អាយុចាប់ពី ៦០ឆ្នាំឡើងទៅ និង​សមាជិក​ដែល​មាន​ផ្ទុក​មេរោគអេដស៍ ដែលរស់នៅក្នុងគ្រួសារក្រីក្រ ២វិញ ទទួលបាន ២៨ ០០០រៀល ក្នុង​មួយនាក់។

ផ្នែកទី ២ គឺសំដៅលើគ្រួសារក្រីក្រ និងងាយរងគ្រោះរស់នៅទីប្រជុំជនក្រៅរាជធានីភ្នំពេញ។ សម្រាប់​គ្រួសារ​មានបណ្ណសមធម៌ ទាំងកម្រិត ១ និងកម្រិត ២ទទួលបាន ១២ម៉ឺនរៀលដូចគ្នា។ កុមារអាយុ ០-៥ឆ្នាំ ជនមានពិការភាព មនុស្សចាស់អាយុចាប់ពី ៦០ឆ្នាំឡើងទៅ និងសមាជិក​ដែល​មាន​ផ្ទុកមេរោគអេដស៍ ដែលរស់នៅក្នុងគ្រួសារក្រីក្រកម្រិត ១ ទទួលបាន ៤ម៉ឺនរៀលក្នុង ១នាក់​។ រីឯ កុមារអាយុ ០-៥ឆ្នាំ ជនមានពិការភាព មនុស្សចាស់អាយុចាប់ពី ៦០ឆ្នាំឡើងទៅ និង​សមាជិក​ដែល​មានផ្ទុកមេរោគអេដស៍ ដែលរស់នៅក្នុងគ្រួសារក្រីក្រកម្រិត ២ ទទួលបាន ២៨ ០០០​រៀល​ក្នុង១នាក់។

ផ្នែកទី ៣សំដៅលលើគ្រួសារក្រីក្រ និងងាយរងគ្រោះនៅជនបទ។ គ្រួសារក្រីក្រ ដែលមាន​បណ្ណ​សម​ធម៌ ទាំងកម្រិត ១ និងកម្រិត ២ ទទួលបាន ៨ម៉ឺនរៀលដូចគ្នា។ កុមារអាយុ ០-៥ឆ្នាំ ជន​មាន​ពិការភាព មនុស្សចាស់អាយុចាប់ពី ៦០ឆ្នាំឡើងទៅ និង​សមាជិក​ដែល​មាន​ផ្ទុក​មេរោគ​អេដស៍ ទទួលបាន ២៤ ០០០រៀលក្នុង ១នាក់ សម្រាប់គ្រួសារក្រីក្រកម្រិត ១។ ចំពោះ​កុមារ​អាយុ ០-៥ឆ្នាំ ជនមានពិការភាព មនុស្សចាស់អាយុចាប់ពី ៦០ឆ្នាំឡើងទៅ និង​សមាជិក​ដែល​មាន​ផ្ទុក​មេរោគអេដស៍រស់នៅក្នុងគ្រួសារកម្រិត ២វិញ ទទួលបាន ១៦ ០០០រៀលក្នុង១នាក់៕ អត្ថបទ៖ គឹម ហុក