​បាល់ទាត់៖ ​ខ្សែប្រយុទ្ធ​ក្រុម​ជំរើសជាតិ​ហូ​ឡង់ Luuk de Jong អស់​ឱកាស​បង្ហាញខ្លួន​នៅ Euro ២០២០ នេះហើយ​បន្ទាប់ពី​រងរបួស​ជង្គង់​អំឡុង​ការហ្វឹកហាត់​កាលពី​ថ្ងៃ​អង្គារ​។

​​ខ្សែប្រយុទ្ធ​របស់​ក្លិប​ Sevilla រូបនេះ​បាន​ត្រឹម​ជា​កីឡាករ​បម្រុងផ្លាស់ប្តូរ​ចូល ២​ប្រកួត​ដំបូង​របស់ហូ​ឡង់ និង​អង្គុយ​កៅអី​បម្រុង​ពេញ ១​ប្រកួត​ពេល​ហូ​ឡង់​យកឈ្នះ​ម៉ា​សេ​ដ្វា​ន់​ខាងជើង ៣-០ កាលពី​ថ្ងៃ​ចន្ទ​។ ​​មួយថ្ងៃ​ក្រោយមក​កីឡាករ​វ័យ ៣០ឆ្នាំ​រូបនេះ​បាន​រងរបួស ​អំឡុង​ការហ្វឹកហាត់​ប៉ះ​ជាមួយ​កីឡាករ​របស់ PSV, Cody Gakpo ដែល​ធ្វើអោយ​អតីត​ខ្សែប្រយុទ្ធ​កំពូល​របស់ PSV រូបនេះ​មាន​របួស​ជង្គង់ និង​ក្រោយមក​ក្រុម​ពេទ្យ​អោយដឹងថា​ របួស​នេះ​ធ្វើអោយ De Jong មិនអាច​ប្រកួត​បាន​ទៀតឡើយ​នៅ Euro ២០២០ នេះ​។

​​Luuk de Jong បាន​ក្លាយជា​កីឡា​ករទី​២ ​របស់ក្រុម​ហូ​ឡង់​នៅ Euro ដែលមាន​របួស​បន្ទាប់​ពី​ខ្សែបម្រើ Donny van der Beek មានន័យថា​ ក្រុម​របស់លោក Frank de Boer នៅសល់​កីឡាករ​ត្រឹម ២៤នាក់​សំរាប់​វគ្គ​បន្ត​។ ​​រំលឹកថា Luuk de Jong ធ្លាប់​បង្ហាញខ្លួន​សរុប​អោយ​ក្រុម​ហូ​ឡង់ ៣៨លើក​រកបាន ៨គ្រាប់​៕

​អត្ថបទ​៖​នាង សុភា​វុ​ធ