សហរដ្ឋអាមេរិក ចង់ឲ្យអ៊ុយក្រែនកែលម្អផែនការសង្គ្រាមប្រឆាំងនឹងរុស្ស៊ី ហើយត្រូវបានគេរំពឹងថា នឹងលើកបញ្ហានេះ ជាមួយប្រធានាធិបតី លោក វ៉ូឡូមៀ ហ្សេឡិនស្គី ( Volodymyr Zelenskyy) នៅទីក្រុង Davos ប្រទេសស្វ៊ីស នៅសប្តាហ៍ក្រោយ។

ប្រភពរបស់ទីភ្នាក់ងារនេះ បាននិយាយក្នុងលក្ខខណ្ឌមិនបញ្ចេញឈ្មោះថា លោក Jake Sullivan ទីប្រឹក្សាសន្តិសុខជាតិរបស់សហរដ្ឋអាមេរិក ប្រហែលជានឹងលើកយកប្រធានបទនេះជាមួយមេដឹកនាំអ៊ុយក្រែន

ប្រភពនេះ បាននិយាយថា មន្ត្រីអាមេរិក នឹងទទូចអំពីបញ្ហានេះ ក្នុងប៉ុន្មានសប្តាហ៍ខាងមុខ ដើម្បីពិភាក្សាអំពីបញ្ហាដែលមិនមែនសាធារណៈទាំងនេះ។

ជាពិសេស យោងតាមប្រភពទីភ្នាក់ងារ ភាពខុសគ្នារវាង លោកហ្សេឡិនស្គី និងអគ្គមេបញ្ជាការអ៊ុយក្រែន លោក Valerii Zaluzhnyi កំពុងធ្វើឲ្យមន្ត្រីក្នុងទីក្រុងវ៉ាស៊ីនតោនព្រួយបារម្ភថា កិច្ចខិតខំប្រឹងប្រែងដើម្បីពង្រឹងយុទ្ធសាស្ត្រថ្មីមួយ កំពុងត្រូវបានពន្យឺតដំណើរការ។

ប្រភពមួយ បានអះអាងថា បច្ចុប្បន្ននេះ យោធាអ៊ុយក្រែន កំពុងបង្កើតផែនការសម្រាប់ឆ្នាំ ២០២៤ ហើយជម្រើសជាច្រើន កំពុងត្រូវបានពិចារណា។

លោកបានបន្ថែមថា សហរដ្ឋអាមេរិកចង់កំណត់វិធីល្អបំផុត ដើម្បីបញ្ជូនការគាំទ្ររបស់ខ្លួន ដើម្បីជួយអ៊ុយក្រែនការពារខ្លួន នៅឆ្នាំក្រោយ។ សម្ព័ន្ធមិត្តរបស់ទីក្រុងគីវនិយាយថា ការបង្កើតយុទ្ធសាស្ត្រយោធាច្បាស់លាស់មួយ ដើម្បីការពារទីតាំងបច្ចុប្បន្ន និងការទម្លាយខ្សែត្រៀមនានារបស់រុស្ស៊ី គឺពិតជាសំខាន់   ណាស់។