កិច្ចខិតខំប្រឹងប្រែងជួយសង្រ្គោះនៅតែបន្ត បន្ទាប់ពីរញ្ជួយដីដ៏ធំកាលពីថ្ងៃចូលឆ្នាំសកល នៅប្រទេសជប៉ុនភាគកណ្តាល។ យ៉ាងហោចណាស់មនុស្ស ២១៥នាក់ ត្រូវបានបញ្ជាក់ថាបានស្លាប់ ហើយ៣៨នាក់ទៀត នៅបាត់ខ្លួននៅឡើយ។ មន្ត្រីនៅក្នុងខេត្ត Ishikawa កំពុងព្រមានថា អាកាសធាតុកាន់តែអាក្រក់អាចគំរាមកំហែងដល់អាយុជីវិតកាន់តែច្រើន។ ប្រជាជនមួយចំនួន អាចវិលត្រឡប់ទៅតំបន់រងគ្រោះខ្លាំងវិញបាន ដើម្បីធ្វើការវាស់ស្ទង់ពីការខូចខាត។ ស្រុកមួយក្នុងក្រុងអាណាមិហ្ស៊ុ ជាក្រុងមានហាងទំនិញប្រហែល ៤០ហាង ដែលហាងភាគច្រើនបានដួលរលំ ឬបានខូចខាតធ្ងន់ធ្ងរ។ ប្រធានសមាគមធុរកិច្ចក្នុងស្រុក លោក Yoshimura Fusaji បាននិយាយថា ការខូចខាតលើកនេះគឺធ្ងន់ធ្ងរខ្លាំង។ មនុស្សជាង ២.៥០០នាក់ នៅតែឯកោ នៅតំបន់មួយចំនួននៃខេត្ត Ishikawa ។ កិច្ចខិតខំប្រឹងប្រែងដើម្បីទៅដល់ពួកគេ និងដើម្បីស្វែងរកអ្នកនៅតែបាត់ខ្លួន អាចមានការរាំងស្ទះដោយសារមានភ្លៀងធ្លាក់ និងការព្យាករណ៍អាកាសធាតុត្រជាក់ខ្លាំងភ្លាមៗសម្រាប់តំបន់មួយចំនួនដែលរងគ្រោះខ្លាំងបំផុត។ ក្រុមមន្ត្រីកំពុងបញ្ជាក់លើគ្រោះថ្នាក់ដែលបង្កឡើងដោយការខ្វះកម្តៅ។ វេជ្ជបណ្ឌិតម្នាក់ ដែលត្រូវបានដាក់ពង្រាយដើម្បីជួយឆ្លើយតបចំពោះការរញ្ជួយដី និយាយថា អ្នកស្លាប់ស្លាប់មួយចំនួន អាចបណ្ដាលមកពីភាពត្រជាក់។ សាស្ត្រាចារ្យ លោក Mizukami Hajime នៅសាកលវិទ្យាល័យវេជ្ជសាស្ត្រ ទីក្រុង Kanazawa និយាយថា លោកជឿថា មនុស្សមួយចំនួនបានទទួលរងនូវការខ្វះកម្តៅ បន្ទាប់ពីបានជាប់នៅក្រោមធ្នឹមផ្ទះដែលត្រូវបានបំផ្លាញ។ មនុស្សជាង ២៣.០០០នាក់ កំពុងស្នាក់នៅក្នុងទីជម្រក រួមមានកន្លែងនានាដូចជា កន្លែងហាត់កីឡានៅ សាលារៀន។ រដ្ឋាភិបាលកណ្តាល សង្ឃឹមថានឹងរកបានសណ្ឋាគារ ឬកន្លែងស្នាក់នៅផ្សេងទៀត សម្រាប់អ្នកភៀសខ្លួន។ រដ្ឋាភិបាលមានគោលបំណងធានាបានកន្លែងស្នាក់នៅសម្រាប់មនុស្ស ១០.០០០នាក់នៅចុងសប្តាហ៍នេះ។ ស្ថានភាពបែនេះធ្ងន់ធ្ងរខ្លាំង ជាពិសេសសម្រាប់មនុស្សចាស់នៅក្នុងតំបន់រងគ្រោះដោយរញ្ជួយដី។