សម្តេច ប៉ាប ហ្វ្រង់ស៊ីស កាលពីថ្ងៃអាទិត្យ (ទី១៤ ខែមករា) បានមានបន្ទូលការពារនូវការសម្រេចព្រះទ័យដ៏សំខាន់ ដែលព្រះអង្គយល់ព្រមយាងផ្ដល់ប្រសិទ្ធពរជ័យដល់គូស្នេហ៍ភេទដូចគ្នា ដោយមានបន្ទូលថា អ្នកនៅក្នុងព្រះវិហារកាតូលិក ដែលបានប្រឆាំងនឹងគូស្នេហ៍បែបនេះ បានទាញឲ្យមាននូវ «ការសន្និដ្ឋានដ៏អាក្រក់» ដោយសារតែពួកគេមិនយល់ពីបញ្ហានេះ។

នៅក្នុងបទសម្ភាសតាមទូរទស្សន៍ សម្ដាប ប៉ាប បានមានបន្ទូលបញ្ចេញមតិជាសាធារណៈលើកដំបូងរបស់ព្រះអង្គ ចាប់តាំងពីថ្ងៃទី១៨ ខែធ្នូ បានជំរុញឲ្យមានការជជែកដេញដោលយ៉ាងទូលំទូលាយ នៅក្នុងចំណោមវិហារកាតូលិកនេះ ដោយអ្នកដឹកនាំបង្រៀនខ្លះនៅក្នុងប្រទេសមួយចំនួន ជាពិសេសនៅទ្វីបអាហ្រ្វិក បដិសេធមិនអនុញ្ញាតឲ្យបព្វជិតរបស់ខ្លួនធ្វើការផ្ដល់ពរជ័យដល់គូស្នេហ៍បែបនេះនោះឡើយ។

អំឡុងផ្ដល់បទសម្ភាសនៅលើប៉ុស្តិ៍លេខ 9 របស់ប្រទេសអ៊ីតាលីពីបុរីវ៉ាទីកង់ សម្ដេច ប៉ាប បានមានព្រះបន្ទូលថា៖ «អ្វីដែលគ្រោះថ្នាក់នោះ គឺថា ប្រសិនបើខ្ញុំមិនចូលចិត្តអ្វីមួយហើយ ខ្ញុំបានទុកវា (ផ្ទុយ) នៅក្នុងបេះដូងរបស់ខ្ញុំ ខ្ញុំក្លាយជាអ្នកប្រឆាំង និងទាញរកការសន្និដ្ឋានយ៉ាងអាក្រក់»

ដោយសំដៅទៅលើការប្រកាស ដែលមានចំណងជើងជាឡាតាំង «Fiducia Supplicans» (Supplicating Trust) (ការអំពាវនាវសុំជំនឿចិត្ត) ដែលវាត្រូវបានចេញដោយនាយកដ្ឋានគោលលទ្ធិរបស់បុរីវ៉ាទីកង់ ហើយត្រូវបានអនុម័តយល់ព្រមពីព្រះអង្គនោះ សម្ដេច ប៉ាប បានមានព្រះបន្ទូលបញ្ជាក់ថា៖ «នេះគឺជាអ្វីដែលបានកើតឡើងជាមួយនឹងការសម្រេចចិត្តចុងក្រោយបង្អស់ទាំងនេះ ក្នុងការផ្ដល់ពរជ័យសម្រាប់ទាំងអស់គ្នា»។

វិហារកាតូលិកបង្រៀនថា អ្នកមានសម្ព័ន្ធភេទដូចគ្នា គឺជាអំពើបាប និងគ្មានវិន័យខាងផ្លូវចិត្ត ហើយមនុស្សដែលអ្នកទំនោរចិត្តទៅរកការស្រឡាញ់ភេទដូចគ្នា គួរព្យាយាមធ្វើខ្លួនឲ្យបរិសុទ្ធ៕