យុវជនមកពីគ្រួសារក្រីក្រ មានសុទិដ្ឋិនិយមថា ជីវភាពគ្រួសារនឹងធូរធារជាងមុន បន្ទាប់​ពី​រៀន​ជំនាញ បច្ចេកទេសចប់ ខណៈមន្ត្រីជំនាញ បានបញ្ជាក់ថា ការ​រៀន​ជំនាញ​បច្ចេកទេស​ពិត​ជា​នឹង​ផ្តល់​ប្រយោជន៍ យ៉ាងសំខាន់សម្រាប់ទ្រទ្រង់ជីវភាពរស់នៅ ។

យុវជនដែលបានចុះឈ្មោះចូលរៀននៅវិទ្យាស្ថានជាតិពហុបច្ចេកទេសតេជោសែន នៅ​ក្រុង​តាខ្មៅ ខេត្តកណ្ដាល នៅថ្ងៃទី១៥ ខែមករា នេះ ដែលជាថ្ងៃបើកដំណើរការរៀនសូត្រនោះ បាន​បង្ហាញ​នូវក្ដីសប្បាយរីករាយក្នុងឱកាសពួកគេបានចូលរៀនជំនាញបច្ចេកទេស ក្នុង​កម្ម​វិធី​បណ្ដុះ​បណ្តាល​ជំនាញវិជ្ជាជីវៈ និងបច្ចេកទេស ដែលត្រូវបានផ្ដល់​ជូន​ជា​អាទិភាព​ដល់​យុវជន​មក​ពី​គ្រួសារ​ក្រីក្រ និងគ្រួសារងាយរងហានិភ័យ ដែល​ជា​កម្ម​វិធី​នយោបាយ​អាទិភាព​មួយ​ក្នុង​ចំណោម​កម្ម​វិធី​នយោបាយដទៃទៀត របស់រាជ រដ្ឋាភិបាលអាណត្តិទី៧នេះ ។ យុវជនក្រីក្រ បានបញ្ជាក់ថា ការចូលរៀនជំនាញបច្ចេកទេសនេះ គឺជាក្ដីប្រាថ្នា និងប្តេជ្ញារៀនឱ្យ ចេះ​ពិត​ប្រាកដ ។

លោក ច្រឹង ណារី នាយកវិទ្យាស្ថានជាតិពហុបច្ចេកទេសតេជោសែន ក្នុងក្រុងតាខ្មៅ បាន​ឲ្យ​ដឹង​ថា ជាទូទៅ សិស្ស ដែលរៀនជំនាញនៅវិទ្យាស្ថាន គឺមួយផ្នែកធំ មាន​ការងារ​ធ្វើ​នៅ​តាម​បណ្តា​ក្រុមហ៊ុន សហគ្រាស និងមួយ ផ្នែកទៀត បង្កើតមុខរបរដោយខ្លួនឯង ដូច្នេះការរៀន​ជំនាញ​បច្ចេកទេស គឺពិតជានឹងផ្តល់ ប្រយោជន៍យ៉ាងសំខាន់សម្រាប់ទ្រទ្រង់ជីវភាពរស់នៅ។

កម្មវិធីបណ្ដុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារ ងាយ​រងហានិភ័យ មានជំនាញ៣៨ ក្នុងវិស័យអាទិភាពចំនួន១០ រួមមាន៖ទី១. វិស័យសំណង់ ទី២. វិស័យ អគ្គិសនី និងថាមពល ទី៣. វិស័យអេឡិចត្រូនិក ទី៤. វិស័យបរិក្ខារត្រជាក់ និងកំដៅ ទី៥. វិស័យកម្មន្ត សាល ទី៦. វិស័យមេកានិក/មេកានិករថយន្ត ទី៧. វិស័យទេសចរណ៍ ទី៨. វិស័យកសិកម្ម និងកសិ-ឧស្សាហកម្ម ទី៩. វិស័យសេវាកម្ម និងទី១០. វិស័យធុរកិច្ច និង​ព័ត៌មានវិទ្យា៕ អត្ថបទ៖ ទូច សោភ័ណ