មន្ត្រីម្នាក់មកពីក្រុមហ៊ួទី បាននិយាយកាលពីថ្ងៃចន្ទ (១៥ មករា) ថា ចលនា​សម្ព័ន្ធ​មិត្ត​អ៊ីរ៉ង់​របស់​យេម៉ែន​មួយនេះ នឹងពង្រីកគោលដៅរបស់ខ្លួននៅក្នុងតំបន់សមុទ្រក្រហម ហើយរួម​បញ្ចូល​នាវា​របស់​អាមេរិក ខណៈដែលខ្លួនបានប្តេជ្ញាបន្តការវាយប្រហារបន្ទាប់ពីសហរដ្ឋអាមេរិក និងអង់គ្លេស វាយ​ប្រហារលើទីតាំងរបស់ខ្លួនក្នុងប្រទេសយេម៉ែន។

ការវាយ​ប្រហារដោយក្រុមហ៊ួទីទៅលើនាវាក្នុងតំបន់ចាប់តាំងពីខែវិច្ឆិកា បានប៉ះ​ពាល់​ដល់​ក្រុមហ៊ុន​ជា​ច្រើន និងបាន​ធ្វើ​ឱ្យ​មហា​អំណាច​ព្រួយ​បារម្ភ​នៅ​ក្នុង​ការ​កើន​ឡើង នៃ​សង្គ្រាម​រយៈ​ពេល​ជាង ៣ខែរបស់អ៊ីស្រាអែល ជាមួយក្រុមសកម្មប្រយុទ្ធហាម៉ាស នៅក្នុងតំបន់ហ្កាហ្សា។ ក្រុម​នេះ​និយាយ​ថា ខ្លួនកំពុងធ្វើសកម្មភាពក្នុងការរួបរួមជាមួយប៉ាឡេស្ទីន។

លោក ណាសរ៉ុលឌីន អាមឺ (Nasruldeen Amer) អ្នកនាំពាក្យរបស់ក្រុមហ៊ួទី បាន​ប្រាប់​សារ​ព័ត៌មាន អាល់ចាហ្ស៊ីរ៉ា (Al Jazeera) ថានាវាអង់គ្លេស និងអាមេរិកបានក្លាយជា «គោល​ដៅ​ស្រប​ច្បាប់​» ដោយ​សារ​តែ​ការ​វាយ​ប្រហារ​ដែល​ធ្វើឡើ​ង​ដោយ​ប្រទេស​ទាំង​ពីរ​លើ​ប្រទេស​យេម៉ែន​កាល​ពី​សប្តាហ៍​មុន។ ក្រុមហ៊ួទីនេះពីមុនបាននិយាយថា ពួកគេនឹង​កំណត់​គោលដៅ​តែ​លើ​នាវា​អ៊ីស្រាអែល ឬនាវាដែលធ្វើដំណើរទៅកាន់អ៊ីស្រាអែលប៉ុណ្ណោះ។

នៅក្នុង​ការវាយប្រហារចុងក្រោយបំផុត ទីបញ្ជាការកណ្តាលរបស់សហរដ្ឋអាមេរិក បាននិយាយថា កង​កម្លាំង​ហ៊ួទី នៅក្នុងប្រទេសយេម៉ែន បានវាយប្រហារលើនាវា ហ្គីប្រាលតា អ៊ីហ្គល (Gibraltar Eagle) ដែលជាកម្មសិទ្ធិរបស់សហរដ្ឋអាមេរិក និង​ប្រតិបត្តិការ​ដោយ​មីស៊ីល​បាលិស្ទិក​ប្រឆាំង​នាវា​កាល​ពី​ថ្ងៃចន្ទ ប៉ុន្តែមិនមានរបាយការណ៍អំពីការរងរបួស ឬការខូចខាត​គួរ​ឱ្យ​កត់​សម្គាល់​ឡើយ​៕