ក្រុមហាម៉ាស បានបង្ហាញសាកសពចំណាប់ថ្នូរជនជាតិអ៊ីស្រាអែលពីរនាក់ កាលពីថ្ងៃចន្ទ (១៥ មករា) បន្ទាប់​ពីព្រមាន​អ៊ីស្រាអែល​ថា​ចំណាប់​ថ្នូរ​អាច​នឹង​ត្រូវ​បាន​សម្លាប់​ប្រសិ​ន​បើ​មិន​បញ្ឈប់​ការ​ទម្លាក់​គ្រាប់​បែករបស់ខ្លួនទៅលើតំបន់ហ្កាហ្សា។

វីដេអូថ្មីមួយដែលចេញផ្សាយដោយក្រុមសកម្មប្រយុទ្ធប៉ាឡេស្ទីនមួយនេះ បានបង្ហាញ​ឱ្យ​ឃើញ​ពី​សាក​សព​របស់ចំណាប់ថ្នូរម្នាក់ឈ្មោះ យ៉ូសស៊ី សារ៉ាប៊ី (Yossi Sharabi) អាយុ ៥៣ឆ្នាំ និងម្នាក់​ទៀត​ឈ្មោះ អ៊ីតៃ ស្វឺស្គី (Itai Svirsky) អាយុ ៣៨ឆ្នាំ ដែលអ្នកទាំង​ពីរ​ធ្លាប់​បាន​បង្ហាញ​ខ្លួន​នៅ​ក្នុង​វីដេអូ​ដំបូងកាលពីថ្ងៃអាទិត្យ។

វីដេអូក៏​បានបង្ហាញផងដែរនូវចំណាប់ថ្នូរជនជាតិអ៊ីស្រាអែលទីបី ដែលជា​និស្សិត​សាកល​វិទ្យាល័យ​ឈ្មោះ ណូអា អាហ្កាម៉ានី (Noa Argamani) អាយុ ២៦ឆ្នាំ ហាក់ដូច​ជា​កំពុង​អាន​អក្សរ​នៅ​ពី​មុខ​ជញ្ជាំង​ទទេ​ដោយ​និយាយថា​អ្នក​ទាំង​ពីរ​នោះត្រូវ​បាន​សម្លាប់​ដោយ​ការ​វាយ​ប្រហារ​របស់​អ៊ីស្រាអែល​។

អ្នកនាំពាក្យយោធារបស់អ៊ីស្រាអែលបាននិយាយថា មានការព្រួយ​បារម្ភ​យ៉ាង​ខ្លាំង​ទាក់​ទង​នឹង​ជោគ​វាសនា​របស់ចំណាប់ថ្នូរដែលត្រូវបានគេសន្មត់ថាបានស្លាប់នៅក្នុងវីដេអូនេះ ខណៈ​បញ្ជាក់​ថា​មនុស្ស​ម្នាក់​ដែលកំណត់ថាជាចំណាប់ថ្នូរឈ្មោះ ស្វឺស្គី មិនត្រូវ​បាន​សម្លាប់​ដោយ​ការ​បាញ់​របស់​អ៊ីស្រាអែល​នោះទេ។

ប្រហែលពាក់​កណ្តាល​នៃ​ចំណាប់​ថ្នូរ​ទាំង​នោះ​ត្រូវ​បាន​ដោះលែង​ក្នុង​អំឡុង​ពេល​បទ​ឈប់​បាញ់​ដ៏​ខ្លី​កាល​ពី​ខែវិច្ឆិកា ប៉ុន្តែអ៊ីស្រាអែលនិយាយថាមនុស្ស ១៣២នាក់ នៅតែស្ថិតនៅតំបន់ហ្កាហ្សា ហើយ​មនុស្ស ២៥នាក់បានស្លាប់ក្នុងការចាប់ខ្លួនរបស់ក្រុមហាម៉ាស៕