អ្នកនាំពាក្យក្រសួងការបរទេសចិន លោកស្រី Mao Ning (ម៉ៅ នីង) នៅថ្ងៃអង្គារ (ទី១៦ ខែមករា) នេះ បាននិយាយនៅក្នុងសន្និសីទសារព័ត៌មានជាទៀងទាត់ថា ការលើកឡើងរបស់អ្នកការទូតអាមេរិកអំពីកោះ Nauru ដែលផ្ដាច់ទំនាក់ទំនងជាមួយកោះតៃវ៉ាន់ «បានជ្រៀតជ្រែកយ៉ាងខ្លាំង» ទៅក្នុងកិច្ចការផ្ទៃក្នុងរបស់ប្រទេសចិន។

កោះ Nauru បានកាលពីថ្ងៃចន្ទ (ទី១៥ ខែមករា) បានផ្តាច់ទំនាក់ទំនងជាមួយកោះតៃវ៉ាន់ និងបានបង្កើតទំនាក់ទំនងការទូតជាមួយប្រទេសចិន។ នៅថ្ងៃអង្គារនេះ មន្ត្រីអាមេរិកម្នាក់ដែលជាប្រធានស្ថាប័នគ្រប់គ្រងទំនាក់ទំនងក្រៅផ្លូវការរបស់អាមេរិកជាមួយកោះតៃវ៉ាន់ បានរិះគន់ចំពោះការសម្រេចរបស់កោះ Nauru។

ប្រធានវិទ្យាស្ថានអាមេរិកដែលមានមូលដ្ឋាននៅរដ្ឋ Virginia ប្រចាំកោះតៃវ៉ាន់ (AIT) លោកស្រី Laura Rosenberger បានប្រាប់អ្នកសារព័ត៌មាននៅទីក្រុងតៃប៉ិថា សកម្មភាពផ្លាស់ប្ដូររបស់កោះ Nauru គឺជា «រឿងគួរឲ្យសោកស្ដាយ» ហើយថា សហរដ្ឋអាមេរិកលើកទឹកចិត្តឲ្យប្រទេសទាំងអស់ពង្រីកការចូលរួមជាមួយកោះតៃវ៉ាន់។

អំឡុងពេលថ្លែងនៅទីក្រុងប៉េកាំង អ្នកនាំពាក្យក្រសួងការបរទេស លោកស្រី Mao Ning បាននិយាយថា សហរដ្ឋអាមេរិកបាន «លាបពណ៌» ដល់ប្រព័ន្ធការទូតរបស់ប្រទេសចិន និង «ធ្វើការកត់សម្គាល់ដោយគ្មានការទទួលខុសត្រូវ» ជុំវិញការសម្រេចដែលធ្វើឡើងដោយឯករាជ្យដោយប្រទេសអធិបតេយ្យមួយ៕