ជនជាតិប៉ាឡេស្ទីន ដែលភៀសខ្លួនទៅជ្រកកោនក្នុងទីក្រុងរ៉ាហ្វា (Rafah) នៅថ្ងៃអង្គារនេះ បានដុតខិត្ដប័ណ្ណជាច្រើនសន្លឹកដែលត្រូវបានទម្លាក់ដោយកងទ័ពអ៊ីស្រាអែល ដើម្បីបញ្ជាឲ្យប្រជាជនក្នុងក្រុងខានយូនីស (Khan Younis) ជម្លៀសខ្លួនចេញពីសង្កាត់អាល់ ម៉ាណារ៉ា (al-Manara) និងសង្កាត់ អាល់ សាឡាំ (al-Salam)។

ក្រុមប្រដាប់អាវុធហាម៉ាស កាលពីថ្ងៃច័ន្ទ បាននិយាយថា អ្នកប្រយុទ្ធរបស់ខ្លួន បានពួនស្ទាក់វាយប្រហារ និងសម្លាប់ទាហានអ៊ីស្រាអែល៥នាក់ នៅភាគខាងត្បូងទីក្រុងខាន យូនីស។

មន្រ្ដីសុខាភិបាលប៉ាឡេស្ទីន បាននិយាយនៅពេលមុននេះថា មនុស្ស៧នាក់ ត្រូវបានសម្លាប់ និងមួយចំនួនទៀត បានរងរបួសនៅក្នុងការវាយប្រហារតាមអាកាសរបស់អ៊ីស្រាអែលនៅជិតមន្ទីរពេទ្យណាស៊ើរ (Nasser)។

ក្រសួងសុខាភិបាលក្នុងតំបន់ហ៊ុមព័ន្ធនេះបាននិយាយនៅក្នុងសេចក្ដីថ្លែងការណ៍មួយថា យ៉ាងហោចណាស់ជនជាតិប៉ាឡេស្ទីន២៤.២៨៥នាក់ ត្រូវបានសម្លាប់ និង៦១.១៥៤នាក់ទៀត បានរងរបួស នៅក្នុងការវាយប្រហាររបស់អ៊ីស្រាអែលលើតំបន់ហ្កាហ្សា តាំងពីថ្ងៃទី៧តុលាមក។

ក្រសួងសុខាភិបាលបានបន្ថែមថា ជនជាតិប៉ាឡេស្ទីនចំនួន១៥៨នាក់ ត្រូវបានសម្លាប់និង៣២០នាក់ បានរងរបួសនៅក្នុងរយៈពេល២៤ម៉ោងកន្លងទៅនេះ៕