ប្រធានាធិបតីអ៊ុយក្រែនលោក វ្ល៉ូឌីមី ហ៊្សេឡិនស្គី (Volodymyr Zelenskiy) កាលពីថ្ងៃអង្គារ (១៦ មករា) បានជំរុញឱ្យលោកខាងលិចបន្តរឹតបន្តឹងការដាក់សម្ពាធលើមេដឹកនាំវិមានក្រឹមឡាំងលោក វ្ល៉ាឌីមៀ ពូទីន និងបង្កើនការគាំទ្ររបស់ខ្លួនសម្រាប់ទីក្រុងគីវ ដើម្បីធានាថាទីក្រុងមូស្គូ មិនទទួលបានជោគជ័យក្នុងសង្គ្រាមរបស់ខ្លួន។

ប្រធានាធិបតីអ៊ុយក្រែនរូបនេះបានប្រាប់វេទិកាសេដ្ឋកិច្ចពិភពលោកនៅទីក្រុងដេវ៉ូស (Davos) ក្នុងសុន្ទរកថាដ៏រំជួលចិត្តមួយថា ការស្ទាក់ស្ទើររបស់លោកខាងលិចក្នុងការគាំទ្ររបស់ខ្លួនសម្រាប់ទីក្រុងគីវ និងការភ័យខ្លាចនៃការកើនឡើងនៅក្នុងសង្គ្រាមជាមួយរុស្ស៊ី បានធ្វើឱ្យខាតបង់ពេលវេលា និងអាយុជីវិតមនុស្សជាច្រើន ហើយអាចអូសបន្លាយការប្រយុទ្ធគ្នារាប់ឆ្នាំទៀត។

ជាមួយនឹងការគាំទ្រក្នុងសម័យសង្រ្គាមដ៏រឹងមាំរបស់លោកខាងលិចសម្រាប់ទីក្រុងគីវ ដែលឥឡូវនេះកំពុងជួបឧបសគ្គស្របពេលមានជម្លោះនយោបាយនៅទីក្រុងវ៉ាស៊ីនតោន និងទីក្រុងប្រ៊ុចសែល លោក ហ៊្សេឡិនស្គី បាននិយាយថា ប្រជាជនអឺរ៉ុបចាំបាច់ត្រូវយល់ថាផែនការរបស់លោកពូទីន មិនមែនត្រឹមតែសង្គ្រាមនៅអ៊ុយក្រែនទេ។

រយៈពេលជិតពីរឆ្នាំបន្ទាប់ពីរុស្ស៊ីបានបើកការឈ្លានពានពេញលេញរបស់ខ្លួន លោក ហ៊្សេឡិនស្គី បាននិយាយថា លោកប្រឆាំងយ៉ាងខ្លាំងចំពោះការបង្កកជម្លោះនៅតាមខ្សែសមរភូមិបច្ចុប្បន្នរបស់ខ្លួន។ លោកបានបន្ថែមថា ការដាក់ទណ្ឌកម្មលើទីក្រុងមូស្គូ ចាំបាច់ត្រូវអនុវត្តឲ្យបានត្រឹមត្រូវ ហើយថាកង្វះទណ្ឌកម្មលើវិស័យនុយក្លេអ៊ែររបស់រុស្ស៊ី គឺជាការបង្ហាញពីភាពទន់ខ្សោយរបស់លោកខាងលិច៕