ក្រសួងការបរទេសកូរ៉េខាងត្បូងបាននិយាយនៅថ្ងៃពុធ (១៧ មករា) នេះថាប្រទេសកូរ៉េខាងត្បូងបានដាក់ទណ្ឌកម្មលើបុគ្គលចំនួន ២រូប អង្គភាពចំនួន ៣ស្ថាប័ន និងនាវាចំនួន ១១គ្រឿង ដែលភ្ជាប់ទៅនឹងកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។

ការប្រកាសដាក់ទណ្ឌកម្មនេះ ធ្វើឡើងប៉ុន្មានថ្ងៃបន្ទាប់ពីប្រទេសកូរ៉េខាងជើង បានបាញ់មីស៊ីលកម្រិតមធ្យមថ្មីមួយ ដែលជាមីស៊ីលល្បឿនលឿនជាងសំឡេងដើរដោយឥន្ធនៈរឹង ដែលកូរ៉េខាងត្បូង និងសហរដ្ឋអាមេរិក បានថ្កោលទោសយ៉ាងខ្លាំងថាជាការរំលោភយ៉ាងធ្ងន់ធ្ងរលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ទីក្រុងព្យុងយ៉ាង ក៏បានប្រកាសពីការផ្អាកគោលនយោបាយឆ្លងព្រំដែនជាច្រើនទស្សវត្ស ដោយបានរុះរើអង្គភាពរដ្ឋាភិបាលមួយចំនួនដែលគ្រប់គ្រងទំនាក់ទំនងអន្តរកូរ៉េ និងប្រកាសដាក់កូរ៉េខាងត្បូងជារដ្ឋសត្រូវដាច់ដោយឡែក។

ដោយប្រឈមមុខនឹងការជាប់គាំងនៅអង្គការសហប្រជាជាតិ ទីក្រុងសេអ៊ូល បានងាកទៅរកការដាក់ទណ្ឌកម្មលើទីក្រុងព្យុងយ៉ាង ដោយឯករាជ្យ ឬរួមគ្នាជាមួយទីក្រុងវ៉ាស៊ីនតោន និងទីក្រុងតូក្យូ ដោយព្យាយាមទប់ស្កាត់ប្រភពមូលនិធិរបស់កូរ៉េខាងជើង៕