ប្រទេសចិន កំពុងព្រមានសហរដ្ឋអាមេរិកប្រឆាំងទៅនឹងការកើនឡើងនៃការវាយប្រហាររបស់ខ្លួន ទៅលើក្រុមឧទ្ទាមហ៊ូទី នៅប្រទេសយេម៉ែន ខណៈជម្លោះនៅសមុទ្រក្រហមមានការគំរាមកំហែងកើនឡើងដល់ផលប្រយោជន៍សេដ្ឋកិច្ច និងការទូតរបស់ទីក្រុងប៉េកាំង។ យុទ្ធនាការរយៈពេលជាច្រើនខែរបស់ក្រុមហ៊ូទី ដើម្បីរឹតបន្តឹងចរាចរណ៍តាមផ្លូវសមុទ្រឆ្លងកាត់ផ្លូវទឹកសំខាន់ៗនៅមជ្ឈិមបូព៌ា គឺជាការគម្រាមកំហែង ជាពិសេសចំពោះប្រទេសចិន ដែលពឹងផ្អែកខ្លាំងលើព្រែកជីក ស៊ុយអេ (Suez) និងច្រកសមុទ្រ Bab-el-Mandeb ដើម្បីដឹកជញ្ជូនផលិតផលចិនទៅកាន់ទីផ្សារអឺរ៉ុប។ ប្រទេសចិន ក៏ពឹងផ្អែកខ្លាំងជាងសហរដ្ឋអាមេរិក លើការនាំចូលប្រេង និងឧស្ម័ន ពីប្រទេសដូចជា អារ៉ាប៊ីសាអូឌីត អារ៉ាប់រួម អ៊ីរ៉ង់ និងប្រទេសកាតា។អ្នកនាំពាក្យក្រសួងការបរទេសរបស់ទីក្រុងប៉េកាំង លោកស្រី Mao Ning បានប្រាប់អ្នកសារព័ត៌មានថា ប្រទេសចិន មានការព្រួយបារម្ភអំពីការកើនឡើងភាពតានតឹងនៅសមុទ្រក្រហម ហើយអំពាវនាវឱ្យភាគីពាក់ព័ន្ធអនុវត្តភាពស្ងប់ស្ងាត់ និងអត់ធ្មត់ ដើម្បីទប់ស្កាត់ជម្លោះកុំឱ្យកើនឡើង។ ប្រទេសចិន អំពាវនាវឱ្យភាគីពាក់ព័ន្ធដើរតួនាទីស្ថាបនា និងទទួលខុសត្រូវ ក្នុងការរក្សាសុវត្ថិភាព និងស្ថិរភាពនៅសមុទ្រក្រហម ដែលបម្រើផលប្រយោជន៍រួមរបស់សហគមន៍អន្តរជាតិ។ ក្នុងកម្រិតកាន់តែទូលំទូលាយ ការតបតគ្នាដោយយោធាដែលកំពុងកើនឡើងរវាងសហរដ្ឋអាមេរិក និងក្រុមហ៊ូទី បានគំរាមកំហែងដល់ផលប្រយោជន៍ការទូតនៅមជ្ឈិមបូព៌ារបស់ប្រទេសចិន។ កិច្ចព្រមព្រៀងមួយផ្នែក គឺផ្អែកលើការប្តេជ្ញាចិត្តរបស់ប្រទេសអ៊ីរ៉ង់ ចំពោះប្រទេសចិនក្នុងការកាត់ផ្តាច់ការផ្គត់ផ្គង់ផ្នែកយោធាទៅដល់កងជីវពលយេម៉ែន និងរារាំង ការវាយប្រហាររបស់ ក្រុមហ៊ូទី លើប្រទេសអារ៉ាប៊ីសាអូឌីត និងគោលដៅអន្តរជាតិ។ យោងតាមមន្ត្រីអាមេរិក និងអារ៉ាប់ បានឲ្យដឹងថា ទីក្រុងតេអេរ៉ង់ ក្នុងប៉ុន្មានសប្តាហ៍ថ្មីៗនេះ បានសរសើរដល់ប្រតិបត្តិការនៅសមុទ្រក្រហមរបស់ក្រុម ហ៊ួទី ហើយអង្គភាពយោធាជាន់ខ្ពស់របស់អ៊ីរ៉ង់ ដែលជាកងឆ្មាំបដិវត្តន៍អ៊ីស្លាម បានបង្កប់បុគ្គលិកក្នុងចំណោមកងកម្លាំងរបស់កងជីវពលយេម៉ែន។