ប្រធានាធិបតីបារាំងលោក Emmanuel Macron កាលពីថ្ងៃអង្គារ (ទី១៦ ខែមករា) បានប្រកាសនូវវិធានការដ៏ធំទូលាយមួយ ដែលរាប់ចាប់ពីការគ្រប់គ្រងម៉ោងតាមដានលើកាមេរ៉ារបស់កុមាររហូតដល់ការដំឡើងការបង់ប្រាក់ សម្រាប់ការឈប់សម្រាកពីឪពុកម្តាយ ក្នុងគោលបំណង ដើម្បីពង្រឹនូវអាណត្តិទី២ ឡើងវិញ ដែលត្រូវបានបំផ្លាញដោយកំណែទម្រង់របស់លោក ដែលមិនទទួលបានការពេញចិត្ត និងមានការជំទាស់តវ៉ា។

ក្នុងសន្និសីទសារព័ត៌មានដ៏កម្រ និងរយៈពេលវែង លោក Macron បានផ្តោតលើកង្វល់ប្រចាំថ្ងៃរបស់អ្នកបោះឆ្នោត ក្នុងនោះរួមទាំងសាលារៀន និងតម្លៃនៃការរស់នៅផងដែរ ដោយបញ្ជាក់ថា លោកចង់បើកទំព័រថ្មីលើកំណែទម្រង់សោធននិវត្តន៍ និងអន្តោប្រវេសន៍ ដែលត្រូវបានជំទាស់តវ៉ាកាលពីឆ្នាំមុន។ លោកបានបន្តថា៖ «ប្រទេសបារាំងនឹងកាន់តែរឹងមាំក្នុងពិភពនៃភាពចលាចលនេះ ប្រសិនបើយើងរួបរួមគ្នាកាន់តែខ្លាំងឡើង។ ខ្ញុំជឿជាក់ថា យើងមានទ្រព្យសម្បត្តិទាំងអស់ដែលយើងត្រូវការ ដើម្បីសម្រេចបានជោគជ័យ»។

ការមិនសប្បាយចិត្តចំពោះការកើនឡើងតម្លៃនៃការរស់នៅ និងការកែទម្រង់ កាលពីឆ្នាំមុន បានប៉ះពាល់យ៉ាងធ្ងន់ធ្ងរដល់ការវាយតម្លៃលើគុណសម្បត្តិរបស់លោក Macron និងឱកាសរបស់លោក នៅក្នុងការបោះឆ្នោតសភាអឺរ៉ុបក្នុងខែមិថុនា ដែលគណបក្សរបស់លោកនៅយ៉ាងឆ្ងាយពីក្រោយគណបក្សស្ដាំជ្រុលនិយមរបស់លោកស្រី Marine Le Pen គឺគណបក្ស National Rally។ ដោយសំដៅទៅដល់បញ្ហានោះ លោក Macron បានបញ្ជាក់ពីផែនការកាត់បន្ថយពន្ធ សម្រាប់ប្រជាជនវណ្ណៈកណ្តាល ហើយបាននិយាយថា អគ្គិសនីនឹងនៅតែមានតម្លៃថោកជាងប្រទេសជិតខាងមួយចំនួន ប៉ុន្តែមិនបានផ្តល់ព័ត៌មានលម្អិតនោះឡើយ។

កាលពីសប្តាហ៍មុន ការជ្រើសរើសរបស់លោក Macron ក្នុងការតែងតាំងលោក Gabriel Attal វ័យ ៣៤ឆ្នាំ ដែលកំពុងឡើងប្រជាប្រិយភាពក្នុងរង្វង់អ្នកនយោបាយបារាំង ជានាយករដ្ឋមន្ត្រីវ័យក្មេងបំផុតរបស់ប្រទេសនោះ បានបង្ហាញរួចហើយពីបំណងប្រាថ្នារបស់លោកប្រធានាធិបតី ក្នុងការធ្វើដំណើរឆ្ពោះទៅមុខ ហើយក្នុងពេលជាមួយគ្នា យកឈ្នះចិត្តអ្នកបោះឆ្នោតដែលមានអារម្មណ៍ខឹងសម្បា ដែលត្រូវបានល្បួងដោយគណបក្សស្តាំជ្រុលនិយមរបស់លោកស្រី Le Pen៕