ប្រភពមួយបាននិយាយកាលពីថ្ងៃពុធថា នាយករដ្ឋមន្ត្រីជនជាតិឃើដអ៊ីរ៉ាក់ លោក Masrour Barzani បានលុបចោលកិច្ចប្រជុំជាមួយរដ្ឋមន្ត្រីការបរទេសអ៊ីរ៉ង់ នៅឯវេទិកាសេដ្ឋកិច្ចពិភពលោក នៅទីក្រុងដាវូស (Davos) ក្នុងប្រទេសស្វ៊ីស ដើម្បីតវ៉ាជុំវិញការវាយប្រហារដោយមីស៊ីលរបស់អ៊ីរ៉ង់លើទីក្រុង Erbil របស់ជនជាតិឃើដអ៊ីរ៉ាក់។

កាលពីល្ងាចថ្ងៃចន្ទ អ៊ីរ៉ង់បានវាយប្រហារលើទីក្រុង Erbil ដែលជារដ្ឋធានីនៃតំបន់ឃើដឌីស្តង់ពាក់កណ្តាលស្វយ័តរបស់ប្រទេសអ៊ីរ៉ាក់ ជាមួយនឹងមីស៊ីលបាលិស្ទិក ជាអ្វីដែលខ្លួនបាននិយាយថា ជាការវាយប្រហារលើទីបញ្ជាការចារកម្មរបស់អ៊ីស្រាអែល ដែលការអះអាងនោះ ត្រូវបានបដិសេធយ៉ាងដាច់ខាត ដោយមន្ត្រីឃើដអ៊ីរ៉ាក់ និងអ៊ីរ៉ាក់។

ការវាយប្រហារនេះ បានសម្លាប់មនុស្សយ៉ាងហោចណាស់ ៤ នាក់ រួមទាំងអ្នកជំនួញជនជាតិឃើដដ៏លេចធ្លោម្នាក់ និងកូនតូចរបស់គាត់ផងដែរ។

ការវាយប្រហាររបស់អ៊ីរ៉ង់ បាននាំឲ្យមានជម្លោះការទូតដ៏កម្រជាមួយរដ្ឋាភិបាលអ៊ីរ៉ាក់ ដោយទីក្រុងបាក  ដាដ បានដាក់ពាក្យប្តឹងប្រឆាំងនឹង «ការឈ្លានពាន» របស់អ៊ីរ៉ង់នៅក្រុមប្រឹក្សាសន្តិសុខអង្គការសហប្រជាជាតិ និងបានកោះហៅត្រឡប់មកវិញនូវឯកអគ្គរដ្ឋទូតរបស់ខ្លួនប្រចាំនៅទីក្រុងតេអេរ៉ង់។