តំណាងពិសេសរបស់កូរ៉េខាងត្បូងទទួលបន្ទុកសន្តិភាព និងសន្តិសុខឧបទ្វីបកូរ៉េ លោក Kim Gunn និងលោក Hiroyuki Namazu ដែលជាអ្នកគ្រប់គ្រង និងជាជំនួយការរដ្ឋមន្ត្រីនៃការិយាល័យកិច្ចការអាស៊ី និងមហាសមុទ្ររបស់ប្រទេសជប៉ុន នៅថ្ងៃពុធ ទី១៧ ខែមករា បានជួបប្រជុំគ្នានៅទីក្រុងសេអ៊ូល ដើម្បីពិភាក្សាអំពីកូរ៉េខាងជើង ចំពេលមានភាពតានតឹងកើនឡើងខ្លាំងនៅឧបទ្វីបកូរ៉េ។

ក្រសួងការបរទេសកូរ៉េខាងត្បូង បាននិយាយថា បេសកជននុយក្លេអ៊ែរជាន់ខ្ពស់នៃប្រទេសទាំង២ និងសមភាគីអាមេរិក លោកស្រី Jung Pak ក៏នឹងបើកកិច្ចប្រជុំត្រីភាគី នៅថ្ងៃព្រហស្បតិ៍ (ទី១៨ ខែមករា) ជុំវិញសកម្មភាពថ្មីៗរបស់កូរ៉េខាងជើងដែលបង្កើនភាពតានតឹង ទំនាក់ទំនងទ្វេភាគីជាមួយរុស្ស៊ី និងកិច្ចសហប្រតិបត្តិការយោធា។

ប្រព័ន្ធផ្សព្វផ្សាយរដ្ឋបានរាយការណ៍ថា កាលពីថ្ងៃអាទិត្យសប្តាហ៍មុន (ទី១៤ ខែមករា) កូរ៉េខាងជើងបានសាកល្បងនូវអ្វីដែលខ្លួនហៅថា មីស៊ីលលឿនជាងសំឡេងដើរដោយឥន្ធនៈរឹងថ្មី ដែលមានរយៈចម្ងាយមធ្យម។ ហើយរដ្ឋមន្ត្រីការបរទេសកូរ៉េខាងជើង លោកស្រី Choe Sun Hui ក៏កំពុងបំពេញទស្សនកិច្ចនៅរុស្ស៊ីផងដែរ ចាប់តាំងពីថ្ងៃចន្ទ (ទី១៥ ខែមករា)។

ការបាញ់មីស៊ីល និងដំណើរទស្សនកិច្ចទៅកាន់រុស្ស៊ីនេះ បានកើតឡើងចំពេលមានភាពតានតឹងកាន់តែខ្លាំងឡើង រវាងកូរ៉េទាំង២ បន្ទាប់ពីមានការបាញ់បង្ហោះមីស៊ីលបាលីស្ទិកអន្តរទ្វីបជាបន្តបន្ទាប់របស់ទីក្រុងព្យុងយ៉ាង និងផ្កាយរណបចារកម្មយោធាដំបូងរបស់ខ្លួន ក៏ដូចជាការពង្រឹងទំនាក់ទំនងកាន់តែស៊ីជម្រៅរវាងទីក្រុងព្យុងយ៉ាង និងទីក្រុងមូស្គូ ដែលបានធ្វើឲ្យទីក្រុងវ៉ាស៊ីនតោន និងសម្ព័ន្ធមិត្តមានការព្រួយបារម្ភ៕