រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បានប្រាប់បណ្ដាមេដឹកនាំធុរកិច្ច និងនយោបាយនៅទីក្រុងដេវ៉ូស (Davos) កាលពីថ្ងៃពុធ (១៧ មករា) ថាលោកមិនដែលគិតថាអាចមានពេលវេលាដ៏ឈឺក្បាលមួយក្នុងអាជីពរបស់ខ្លួននៅពេលដែលមានបញ្ហាប្រឈមសកលកាន់តែច្រើន រាប់ចាប់ពីសង្គ្រាមនៅហ្កាហ្សា និងអ៊ុយក្រែន រហូតដល់ភាពតានតឹងលើកោះតៃវ៉ាន់។

លោក ប្លីងខិន បាននិយាយថា ស្ទើរតែគ្មានបញ្ហាណាមួយដែលរដ្ឋបាលរបស់ប្រធានាធិបតីអាមេរិក ចូ បៃដិន (Joe Biden) ចង់ដោះស្រាយ អាចត្រូវបានដោះស្រាយដោយខ្លួនឯងនោះទេ ដោយជំរុញបន្ថែមលើការអត្ថាធិប្បាយកាលពីថ្ងៃអង្គាររបស់នាយករដ្ឋមន្ត្រីចិន លោក លី ឈាំង (Li Qiang) ដែលបានអំពាវនាវឱ្យមានកិច្ចសហប្រតិបត្តិការជាសកលកាន់តែច្រើន។

ដោយពណ៌នាជម្លោះនៅហ្កាហ្សាថាជា «ការវិនាសអន្តរាយ» លោក ប្លីងខិន បាននិយាយថា អ្វីដែលចាំបាច់ដើម្បីដោះស្រាយស្ថានការណ៍គឺការបង្កើតរដ្ឋប៉ាឡេស្ទីន ដោយមានរចនាសម្ព័ន្ធរដ្ឋាភិបាល «ដែលផ្តល់ឱ្យប្រជាជននូវអ្វីដែលពួកគេចង់បាន និងធ្វើការជាមួយអ៊ីស្រាអែលឱ្យមានប្រសិទ្ធភាព»។

រដ្ឋមន្ត្រីការបរទេសអាមេរិករូបនេះបាននិយាយថា ទីក្រុងវ៉ាស៊ីនតោន កំពុងលឺពីស្ទើរតែគ្រប់ប្រទេសនៅមជ្ឈិមបូព៌ាថាពួកគេចង់ឱ្យសហរដ្ឋអាមេរិក នៅលើតុក្នុងការពិភាក្សាអំពីមធ្យោបាយដើម្បីបញ្ចប់សង្គ្រាមរបស់អ៊ីស្រាអែល ជាមួយក្រុមសកម្មប្រយុទ្ធហាម៉ាស នៅតំបន់ហ្កាហ្សា៕