ការិយាល័យនាយករដ្ឋមន្ត្រីប៉ាគីស្ថាន កាលពីថ្ងៃសុក្រ បាននិយាយថា ប្រទេសនេះ មាន​ឆន្ទៈ​យក​ឈ្នះ​លើកំហឹងតិចតួច ជាមួយប្រទេសអ៊ីរ៉ង់ តាមរយៈការសន្ទនា និងផ្នែកការទូត បន្ទាប់​ពី​ប្រទេស​ទាំង​ពីរបាន​វាយប្រហារតគ្នាដោយយានដ្រូន និងមីស៊ីល លើមូលដ្ឋាន​សកម្ម​ប្រយុទ្ធ​នៅ​លើ​ទឹកដី​របស់​ប្រទេស​ទាំងពីរទៅវិញទៅមក។

នាយករដ្ឋមន្ត្រីចាំផ្ទះរបស់ប្រទេសប៉ាគីស្ថាន លោក Anwaar ul Haq Kakar បានកោះប្រជុំ​គណៈ​កម្មាធិការសន្តិសុខជាតិកាលពីថ្ងៃសុក្រ ដោយ​មាន​ការ​ចូលរួម​ពី​ប្រធាន​អង្គភាព​សេវា​យោធា​ទាំងអស់។

យោងតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីបានឲ្យដឹងថា ប្រទេសប៉ាគីស្ថាន បាន​និយាយថា ប្រទេសទាំងពីរនឹងអាចជម្នះទៅវិញទៅមកនូវកំហឹងតិចតួច តាមរយៈការសន្ទនា និង​ផ្នែកការទូត។

ទោះជា​យ៉ាងណា សេចក្តីថ្លែងការណ៍ បានព្រមានថា រាល់ការប៉ុនប៉ងរំលោភលើទឹកដីប៉ាគីស្ថាន នឹង​ត្រូវ​បានឆ្លើយតបដោយកម្លាំងរដ្ឋទាំងស្រុង។ សេចក្តីថ្លែងការណ៍ បានជំរុញឱ្យប្រទេសអ៊ីរ៉ង់ ប្រើ​បណ្តាញទំនាក់ទំនងដែលមានស្រាប់ដើម្បីដោះស្រាយក្តីបារម្ភសន្តិសុខ៕