នាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ (Benjamin Netanyahu) បាន​ប្រកាស​ថា ពីរភាគបីនៃកងកម្លាំងប្រយុទ្ធរបស់ក្រុមហាម៉ាស ត្រូវបាន​សម្លាប់​នៅ​ក្នុង​តំបន់​ហ្កាហ្សាស្រ្ទីប។

លោកណេតាន់យ៉ាហ៊ូ បាន​និយាយ​ក្នុង​អំឡុង​ពេល​សន្និសីទ​សារព័ត៌មាន​នៅ​ទីក្រុង​តែល​អាវីវ​កាល​ពី​ថ្ងៃ​ព្រហស្បតិ៍ថា «មានពីរដំណាក់កាលសម្រាប់ការប្រយុទ្ធគ្នា ទីមួយ​គឺ​ការ​បំផ្លាញ​កង​វរសេនា​ធំ​របស់​ក្រុម​ហាម៉ាស ទាំងនោះ គឺជាក្របខ័ណ្ឌប្រយុទ្ធដែលត្រូវបានរៀបចំរបស់ពួកគេ» នេះបើ​យោង​តាមសារព័ត៌មានរ៉យទ័រ។

លោកបានបន្តថា៖«រហូតមកទល់ពេលនេះ កងវរសេនាធំចំនួន ១៦ ឬ ១៧ ក្នុងចំណោម២៤ ត្រូវបានបំផ្លាញ។ បន្ទាប់ពីនោះ មាន [ដំណាក់កាល] នៃការបោសសម្អាត«ក្រុមសកម្មប្រយុទ្ធ» ឲ្យអស់ពីទឹកដីនេះ »។ «សកម្មភាពទីមួយជាធម្មតា រយៈពេលខ្លីជាង សកម្មភាព​ទី​ពីរ​ជា​ធម្មតា​រយៈ​ពេល​វែងជាង»។

របាយការណ៍របស់សារព័ត៌មានរ៉យទ័របានឲ្យដឹងថា លោកនាយករដ្ឋមន្ត្រីណេតាន់យ៉ាហ៊ូ ក៏​បាន​និយាយ​ថា «ជ័យជម្នះ នឹងត្រូវចំណាយពេលច្រើនខែទៀត ប៉ុន្តែយើងប្តេជ្ញាថា នឹង​សម្រេច​បាន​»៕​