សារព័ត៌មាន The Guardian បានរាយការណ៍កាលពីថ្ងៃទី២២ ខែមករាថា ចក្រភពអង់គ្លេស បានផ្តល់រូបថតផ្កាយរណបរបស់អ្នកជំនាញរបស់អង្គការសហប្រជាជាតិអំពីការដឹកជញ្ជូនទំនិញរបស់កូរ៉េខាងជើងទៅកាន់ប្រទេសរុស្ស៊ី ជាភ័ស្តុតាងក្នុងការស៊ើបអង្កេតលើការជួញដូរអាវុធខុសច្បាប់។

កូរ៉េខាងជើង ត្រូវបានគេចោទប្រកាន់ថា បានផ្គត់ផ្គង់ដល់រុស្ស៊ីនូវគ្រឿងយុទ្ធោបករណ៍សំខាន់ៗ រួមទាំងមីស៊ីលបាលិស្ទិក ចាប់តាំងពីលោកមេដឹកនាំ គីម ជុងអ៊ុន និងលោក វ្ល៉ាឌីមៀ ពូទីន បានជួបប្រជុំគ្នានៅតំបន់ Amur Oblast ភាគខាងកើតនៃប្រទេសរុស្ស៊ី ក្នុងខែកញ្ញា ឆ្នាំ២០២៣។

សារព័ត៌មាន The Guardian បានមើលរបាយការណ៍ដែលមិនបានផ្សព្វផ្សាយពីក្រសួងការពារជាតិចក្រភពអង់គ្លេស ដែលរួមបញ្ចូលរូបភាពនៃនាវារុស្ស៊ី ដែលកំពុងផ្ទុកទំនិញ នៅកំពង់ផែ Najin របស់ប្រទេសកូរ៉េខាងជើង។ នាវាទាំងបីគ្រឿងគឺ ម៉ៃយ៉ា(Maia) អង់ហ្ការ៉ា (Angara) និងម៉ារីយ៉ា (Maria) បន្ទាប់មកបានធ្វើដំណើរទៅកាន់កំពង់ផែរុស្ស៊ី នៅចុងខាងកើត។ រូបថតទាំងនោះ ត្រូវបានថតនៅចន្លោះខែកញ្ញា និងខែធ្នូ។

ក្រសួងការពារជាតិអង់គ្លេស បាននិយាយថា ខ្លួនមិនអាចកំណត់អត្តសញ្ញាណទំនិញនៃកុងតឺន័រទាំងនោះបានទេ។

នាវាទាំង៣គ្រឿង ត្រូវបានរដ្ឋាភិបាលសហរដ្ឋអាមេរិកដាក់ទណ្ឌកម្មចំពោះទំនាក់ទំនងរបស់ពួកគេជាមួយក្រសួងការពារជាតិរុស្ស៊ី។

របាយការណ៍នេះ ត្រូវបានផ្តល់ជូនក្រុមអ្នកជំនាញរបស់អង្គការសហប្រជាជាតិ ដែលផ្តោតលើការរីកសាយអាវុធរបស់កូរ៉េខាងជើង។ គណៈកម្មាធិការនេះ ត្រូវបានគេរំពឹងថា នឹងចេញផ្សាយរបាយការណ៍ចុងក្រោយស្តីពីការនាំចេញអាវុធរវាងកូរ៉េខាងជើង និងរុស្ស៊ី នៅខែក្រោយ។