នាយករដ្ឋមន្ត្រីឥណ្ឌា លោក Narendra Modi បានសម្ពោធឆ្លងប្រាសាទដ៏ធំដែលឧទ្ទិសដល់ព្រះរាម ក្នុងសាសនាហិណ្ឌូ នៅទីក្រុង Ayodhya។ ប្រាសាទនេះលេចឡើងមកជំនួសវិហារអ៊ីស្លាម នាសតវត្សរ៍ទី១៦ ដែលត្រូវបានបំផ្លាញដោយក្រុមអ្នកកាន់សាសនាហិណ្ឌូ ក្នុងឆ្នាំ១៩៩២។ ការបំផ្លិចបំផ្លាញបានបង្កឲ្យមានកុបកម្មទូទាំងប្រទេស ដែលបានបណ្ដាលឲ្យមនុស្សជិត ២.០០០នាក់ ស្លាប់។

ភ្ញៀវរាប់ពាន់នាក់ដែលទទួលបានការអញ្ជើញ ដោយក្នុងនោះរួមទាំងតារាភាពយន្តល្បីៗ និងកីឡាករគ្រិតឃីតផងដែរ បានចូលរួមក្នុងព្រឹត្តិការណ៍នៅទីក្រុង Ayodhya នេះ។ ប៉ុន្តែអ្នកទស្សន៍ទាយកាន់សាសនាហិណ្ឌូខ្លះ និងក្រុមអ្នកប្រឆាំងភាគច្រើនបានធ្វើពហិការ ដោយនិយាយថា លោក Modi កំពុងប្រើប្រាស់ព្រឹត្តិការណ៍នេះជាផលប្រយោជន៍នយោបាយ។

ការបោះឆ្នោតសកល គ្រោងនឹងកើតមានក្នុងប្រទេសឥណ្ឌានៅប៉ុន្មានខែខាងមុខនេះ ហើយគូប្រជែងនយោបាយរបស់លោក Modi បាននិយាយថា គណបក្ស Bharatiya Janata Party (BJP) ដែលកំពុងគ្រប់គ្រងប្រទេស នឹងស្វែងរកសំឡេងឆ្នោតពីឈ្មោះរបស់ប្រាសាទនៅក្នុងប្រទេសដែលមានប្រជាជន ៨០ភាគរយ ជាអ្នកកាន់សាសនាហិណ្ឌូ។

ជាមួយគ្នានេះ ក្រុមអ្នករិះគន់ក៏បានចោទប្រកាន់រដ្ឋាភិបាលផងដែរពីការដើរហួសពីអ្វីដែលជាពិធីបុណ្យសាសនាដ៏សំខាន់ នៅក្នុងប្រទេសដែល យោងតាមរដ្ឋធម្មនុញ្ញ រដ្ឋាភិបាលមិនប្រកាន់សាសនាឡើយ។ ប្រាសាទនេះត្រូវបានសាងសង់ឡើងក្នុងតម្លៃ ២១៧លានដុល្លារ ដោយអ្នកគ្រប់គ្រងប្រាសាទនិយាយថា វាត្រូវបានផ្តល់មូលនិធិពីការបរិច្ចាគឯកជន។

ពិធីដែលត្រូវបានចាក់ផ្សាយតាមទូរទស្សន៍នោះ បានបង្ហាញឲ្យឃើញលោក Modi ធ្វើពិធីសាសនានៅក្នុងទីសក្ការៈរបស់ប្រាសាទ រួមជាមួយនឹងពួកបព្វជិតរបស់សាសនា និងលោក Mohan Bhagwat ប្រធានអង្គការ Rashtriya Swayamsevak Sangh (RSS) ដែលជាប្រភពដើមនៃមនោគមវិជ្ជារបស់គណបក្សជាតិនិយមហិណ្ឌូ។ មានតែជាន់ផ្ទាល់ដីនៃប្រាសាទប៉ុណ្ណោះដែលត្រូវបានបើក ដោយសំណង់ដែលនៅសល់ត្រូវបានរំពឹងថា នឹងបញ្ចប់នៅចុងឆ្នាំនេះ៕