ភ្នំពេញ៖ នាយកដ្ឋានវប្បធម៌និងទេសចរណ៍ខេត្តក្វាងស៊ី កាសែត គ័រស៊ី ដេលី (Guangxi Daily) សារមន្ទីរទីក្រុងលីវចូវ សមាគមសម្ព័ន្ធខ្មែរចិន សារព័ត៌មានពាណិជ្ជកម្ម និងសារព័ត៌មានស៊ីស៊ីថាមស៍ បានសហការគ្នារៀបចំពិធីពិព័រណ៍បេតិកភណ្ឌវប្បធម៌អរូបីកម្ពុជា-ចិន ដែលជាផ្នែកមួយការជំរុញការផ្លាស់ប្តូរប្រជាជន និងប្រជាជន រវាងប្រទេសទាំងពីរឲ្យកាន់តែល្អប្រសើរមួយកម្រិតថែមទៀត។

កម្មវិធី ពិព័រណ៍បេតិកភណ្ឌវប្បធម៌អរូបីកម្ពុជា-ចិននេះ បានប្រារព្ធធ្វើឡើងនៅថ្ងៃទី២១ ខែមករា ឆ្នាំ២០២៤ ក្រោមប្រធានបទ «សម្រស់នៃបេតិកភណ្ឌអរូបី» និងបានប្រព្រឹត្តទៅក្រោមវត្តមានរបស់ ឯកឧត្តម ជួន ចាន់ភារុណ អគ្គនាយករង នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន និងលោក ចាង ផឹង (Zhang Peng) ប្រធានការិយាល័យព័ត៌មាន នៃស្ថានទូតចិនប្រចាំកម្ពុជា។

នៅក្នុងពិធីនាឱកាសនោះ ឯកឧត្តមអគ្គនាយករង បានចាត់ទុកការតាំងពិព័រណ៍វប្បធម៌ និងវប្បធម៌ច្នៃប្រឌិតនេះថា ជាព្រឹត្តិការណ៍ដ៏សំខាន់ក្នុងការផ្លាស់ប្តូរវប្បធម៌ និងជំរុញការផ្លាស់ប្តូរប្រជាជន និងប្រជាជននៃកម្ពុជា-ចិន ក៏ដូចជាចំណងមិត្តភាពរវាងប្រទេសទាំងពីរ។ ,ឯកឧត្តម បានបន្តថា តាមរយៈពិព័រណ៍នេះដែរ កម្ពុជា នឹងអាចរៀនសូត្របន្ថែមពីបទពិសោធន៍របស់ប្រទេសចិន ក្នុងការការពារ និងទទួលស្នងមរតកវប្បធម៌អរូបីជាដើម។

លោក លាវ ស៊ីកាង (Liu Ri Gang) សមាជិកគណៈកម្មាធិការនៃកាសែត គ័ងស៊ី ដេលី បានបញ្ជាក់ថា នេះគឺជាសក្ខីភាពនៃការផ្លាស់ប្តូរវប្បធម៌ទៅវិញទៅមក រវាងប្រទេសទាំងពីរ និងបញ្ជាក់ពីការបន្តធ្វើឱ្យទំនាក់ទំនងសហប្រតិបត្តិការមិត្តភាព រវាងប្រជាជនទាំងពីរឲ្យកាន់តែស៊ីជម្រៅផងដែរ។

លោក បានបញ្ជាក់ថា ប្រទេសចិន និងកម្ពុជា មានប្រវត្តិសាស្ត្រ និងវប្បធម៌ដ៏យូរអង្វែង និងត្រចះត្រចង់ ហើយបេតិកភណ្ឌវប្បធម៌អរូបីដ៏សម្បូរបែប ជាសក្ខីភាពបង្ហាញពីប្រាជ្ញាឆ្លាតវៃ និងគំនិតច្នៃប្រឌិត របស់ប្រជាជនប្រទេសទាំងពីរ ដែលគិតចាប់តាំងពីល្ខោន អូប៉េរ៉ាប៉េកាំង អក្សរផ្ចង់ ការដេរប៉ាក់ និងតម្បាញជនជាតិជាំង របស់ប្រទេសចិន រហូតដល់ល្ខោនខោល ចម្លាក់នៅតាមប្រាសាទ និងតម្បាញសូត្ររបស់ប្រទេសកម្ពុជា ដែលជារបស់បេតិកភណ្ឌអរូបីប្រជាជនទាំងពីរ។ លោកបន្ថែមថា នេះមិនត្រឹមតែជាមោទនភាពនោះទេ ប៉ុន្តែក៏ជាកំណប់ទ្រព្យនៃអរិយធម៌របស់មនុស្សជាតិផងដែរ។

គួរបញ្ជាក់ថា រាជរដ្ឋាភិបាលនៃប្រទេសទាំងពីរ បានកំណត់យកឆ្នាំ២០២៤ ជាឆ្នាំនៃការផ្លាស់ប្តូរប្រជាជន និងប្រជាជនរវាងចិន-កម្ពុជា។ ពិធីបើកជាផ្លូវការ«ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» ត្រូវបានរៀបចំឡើងកាលពីថ្ងៃទី១៣ ខែមករា នៅព្រះលានជល់ដំរី នៃទឹកដីអង្គរ ខេត្តសៀមរាប។ គិតមកដល់ពេលនេះ រយៈពេល៦៦ឆ្នាំហើយ នៃទំនាក់ទំនងការទូតរវាងកម្ពុជា-ចិន ដោយបានក្លាយទៅជាដៃគូយុទ្ធសាស្ត្រគ្រប់ជ្រុងជ្រោយ និងកំពុងកសាងសហគមន៍រួមវាសនាតែមួយ៕