សម្តេចធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា កងកម្លាំងប្រដាប់អាវុធគ្រប់ប្រភេទទាំងអស់ គឺជាកម្លាំងស្នូលដ៏សំខាន់ក្នុងការចូលរួមថែរក្សា​បរិយាកាសសន្តិភាព និងការអភិវឌ្ឍប្រទេសជាតិឱ្យកាន់តែរីកចម្រើនបន្ថែមទៀត ដូច្នេះមិនថាតម្លៃណាក៏ដោយត្រូវតែការពារនូវតម្លៃ សន្តិភាពនេះ ឲ្យខាងតែបានគ្រប់ពេលវេលាទាំងអស់។

ក្នុងឱកាសអញ្ជើញចូលរួមជាអធិបតីភាពក្នុងពិធីអបអរសាទរ ខួបអនុស្សាវរីយ៍លើកទី២៥ឆ្នាំ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ (២៤ មករា ១៩៩៩ - ២៤ មករា ២០២៤) នៅបញ្ជាការដ្ឋានកងទ័ពជើងគោក នាថ្ងៃទី២៤ ខែមករា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា ក្នុងនាមជាកងទ័ពត្រូវតែការពារនូវ​សុខសន្តិភាពឲ្យខាងតែ​បាន​គ្រប់កាលៈទេសៈទាំងអស់ ​ខណៈសន្តិភាពនេះហើយដែលធានាបាននូវការអភិវឌ្ឍប្រទេសជាតិ និងភាពសុខសាន្តរបស់ប្រជាពលរដ្ឋរបស់យើងទាំងមូល។

យ៉ាងណាក៏ដោយសម្តេចធិបតី ហ៊ុន ម៉ាណែត នាយករដ្ឋមន្រ្តី ក៏បានថ្លែងអំណរគុណដល់​នាយទាហាន នាយទាហានរង ពលទាហានទាំងអស់​នៃ​បញ្ជាការដ្ឋាន​កង​ទ័ពជើង​គោក ដែល​បានសហការគ្នាបានយ៉ាងល្អប្រសើរ ​ជាមួយនិងអាជ្ញាធរមូលដ្ឋាន ព្រមទាំងសមត្ថកិច្ចពាក់ព័ន្ធ​ទាំងអស់ ក្នុងបុព្វហេតុការពារសន្តិភាព ​អធិបតេយ្យភាព ​បូរណភាពទឹកដី និងរួមចំណែកដល់​ដំណើរការអភិវឌ្ឍជាតិនាពេលកន្លងមក ​ដែលពលិកម្មយ៉ាងធំធេង ​ដើម្បីជាតិមាតុភូមិ និង​ភាព​សុខសាន្តរបស់ប្រជាជន និងប្រទេសជាតិទាំងមូលផងដែរ។

មួយវិញទៀតសម្តេចធិបតី ​នាយករដ្ឋមន្រ្តីនៃកម្ពុជា​ ក៏បានរំលឹកផងដែរថា ការបង្កើត​បញ្ជាការដ្ឋាន​កងទ័ពជើងគោកកាលពីឆ្នាំ១៩៩៩ ​គឺមានសារសំខាន់បំផុត ​ខណៈកងទ័ពជើងគោក បាន​ចូលរួមប្រតិបត្តិការយ៉ាងសកម្មក្នុងការប្រមូលផ្គុំកងទ័ពគ្រប់ភាគីទាំងអស់ ចូលរួមក្នុង​ការអនុវត្តប្រកបដោយជោគជ័យនូវនយោបាយ ឈ្នះឈ្នះ រួមទាំងបានការពារនូវយន្តការជាច្រើនទៀត ​ដែលបានបណ្តាលឲ្យកម្ពុជាមានសុខសន្តិភាព និង​ការអភិវឌ្ឍៃរហូតដល់សព្វថ្ងៃនេះ៕អត្ថបទ បាន ចក់