តំណាងនៃប្រទេសជាច្រើនរួមមានរុស្ស៊ី បារាំង អាល់ហ្សេរី និងស្លូវេនី ដែលនិយាយនៅឯការជជែកដេញដោលបើកចំហកម្រិតខ្ពស់នៃក្រុមប្រឹក្សាសន្តិសុខអង្គការសហប្រជាជាតិលើបញ្ហាមជ្ឈិមបូព៌ា រួមទាំងសំណួរជុំវិញវិបត្តិប៉ាឡេស្ទីន កាលពីថ្ងៃអង្គារ (២៣ មករា) បានអំពាវនាវជាថ្មីម្តងទៀតឱ្យមានបទឈប់បាញ់មនុស្សធម៌ជាបន្ទាន់នៅតំបន់ហ្កាហ្សាស្ទ្រីប ដែលហែកហួរដោយសង្រ្គាម ដោយបានរំលឹកឡើងវិញថាមធ្យោបាយជាមូលដ្ឋានគ្រឹះដើម្បីបញ្ចប់ជម្លោះប៉ាឡេស្ទីន-អ៊ីស្រាអែល គឺជាដំណោះស្រាយរដ្ឋពីរ។

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បានព្រមានអំពីហានិភ័យនៃការរាលដាលនៃសង្គ្រាមនៅតំបន់ហ្កាហ្សា។

លោក ហ្គុយតឺរេស បាននិយាយថា ហានិភ័យនៃការកើនឡើងសង្រ្គាមក្នុងតំបន់កាន់តែទូលំទូលាយ ឥឡូវនេះកំពុងក្លាយជាការពិតហើយ ដោយជំរុញឱ្យភាគីទាំងអស់ជៀសវាងប្រើប្រាស់វោហាស័ព្ទបែបឈ្លានពាន និងបញ្ឈប់សកម្មភាពដែលអាចបង្កឱ្យមានភាពតានតឹងបន្ថែមទៀត។

រដ្ឋមន្ត្រីការបរទេសប៉ាឡេស្ទីន លោក រីយ៉ាដ អាល់ម៉ាលីគី (Riyad Al-Maliki) បាននិយាយនៅក្នុងកិច្ចប្រជុំថា អ៊ីស្រាអែលមិនមានអំណាចប្រើសិទ្ធវេតូ ទាក់ទងនឹងការទទួលយករដ្ឋប៉ាឡេស្ទីនទៅកាន់អង្គការសហប្រជាជាតិនោះទេ។ ទោះបីជាយ៉ាងណាក៏ដោយ តំណាងអចិន្ត្រៃយ៍របស់អ៊ីស្រាអែលប្រចាំអង្គការសហប្រជាជាតិ លោក ហ្គីឡាដ អឺដាន (Gilad Erdan) បាននិយាយថា សន្តិភាពរវាងអ៊ីស្រាអែល និងប៉ាឡេស្ទីន «អាចសម្រេចបាន» លុះត្រាតែក្រុមហាម៉ាស ត្រូវបានកម្ចាត់ចោល៕