កាលពីថ្ងៃអង្គារសប្តាហ៍មុន មនុស្សជាច្រើនរយនាក់ដែលមានសំឡេងយ៉ាងទ្រហឹងអឺងកង បានឈរនៅទីលានធំតូចមួយរបស់ទីក្រុង Pyin Oo Lwin ដែលជាទីក្រុងតំបន់ភ្នំដ៏ពេញនិយមរបស់សហភាពមីយ៉ាន់ម៉ា ដើម្បីស្តាប់ព្រះសង្ឃដែលមានពាក់វ៉ែនតាផ្ដល់ឧវាទដ៏គួរឲ្យភ្ញាក់ផ្អើលមួយ។ ព្រះសង្ឃអង្គនោះ មានដីកាថា លោក Min Aung Hlaing ដែលជាមេដឹកនាំយោធារបស់ប្រទេសនេះ គួរតែចុះចេញពីតំណែង ហើយឲ្យឧត្តមសេនីយ៍ទោ លោក Soe Win ចូលកាន់តំណែងជំនួសវិញ។

បុរសដែលដឹកនាំរដ្ឋប្រហារឆ្នាំ២០២១ ប្រឆាំងនឹងរដ្ឋាភិបាលជាប់ឆ្នោតរបស់លោកស្រី Aung San Suu Kyi (អ៊ុងសាន ស៊ូជី) ដែលបង្កមានសង្គ្រាមស៊ីវិលដ៏មហន្តរាយនោះ បានប្រឈមមុខនឹងការរិះគន់ពីអន្តរជាតិជាច្រើន ហើយនិងត្រូវបានប្រជាជនមីយ៉ាន់ម៉ាភាគច្រើនស្អប់ខ្ពើម។

តែយ៉ាងណាក្ដី នេះគឺការរិះគន់ដែលចេញមកពីបុគ្គលកម្រិតខ្ពស់។ ព្រះតេជគុណ Pauk Ko Taw គឺជាផ្នែកមួយនៃក្រុមជាតិនិយមជ្រុលនៃបព្វជិតពុទ្ធសាសនា ដែលរហូតមកដល់ពេលនេះ បានស្ថិតនៅពីក្រោយរបបយោធាដោយឥតងាករេ។

ប៉ុន្តែការបរាជ័យជាបន្តបន្ទាប់យ៉ាងធ្ងន់ធ្ងររបស់ពួកកងទ័ពក្រោមដៃរបស់ពួកបះបោរជនជាតិភាគតិច ក្នុងប៉ុន្មានសប្តាហ៍ថ្មីៗនេះ បានជំរុញឲ្យអ្នកធ្លាប់គាំទ្រលោក Min Aung Hlaing ពិចារណាឡើងវិញ។ ព្រះតេជគុណ Pauk Ko Taw បានមានសង្ឃដីកាទៅកាន់ក្រុមមនុស្សថា៖ «ចូរមើលទឹកមុខរបស់លោក Soe Win។ នោះជាទឹកមុខរបស់ទាហានពិតប្រាកដ។ លោក Min Aung Hlaing មិនដូចទេ។ លោកគួរតែផ្លាស់ទៅកាន់តួនាទីស៊ីវិល»។

គេមិនដឹងច្បាស់ថា តើព្រះតេជគុណ Pauk Ko Taw មានការគាំទ្របែបណានៅក្នុងកងកម្លាំងប្រដាប់អាវុធ។ ប៉ុន្តែដីការបស់ព្រះអង្គបានបន្ទរតាមពាក្យសម្ដីរបស់អ្នកគាំទ្ររបបយោធាដទៃទៀត ដែលមានការខកចិត្តកាន់តែខ្លាំងឡើងចំពោះភាពអសមត្ថភាពរបស់មេដឹកនាំយោធាមីយ៉ាន់ម៉ា ក្នុងការកែប្រែស្ថានការប្រឆាំងនឹងគូប្រជែងរបស់ពួកគេ។ ព្រះតេជគុណ Pauk Ko Taw បដិសេធមិនសម្ភាសន៍ជាមួយសារព័ត៌មាន BBC ភូមា៕