ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២៥ មករា ឆ្នាំ​២០២៤​នេះ បានដឹកនាំកិច្ចប្រជុំអន្តរក្រសួង ក្នុងគោលបំណងពិភាក្សា និងដាក់ចេញវិធានការ និង​​យុទ្ធនាការរួមគ្នា ដើម្បីទប់ស្កាត់អគ្គិភ័យនៅតាមរោងចក្រសហគ្រាស និងគ្រឹះស្ថាន​ក្នុង​វិស័យ​កម្មន្តសាល និងវិស័យឧស្សាហកម្មទេសចរណ៍។

ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា កិច្ចប្រជុំ ក្រៅពីថ្នាក់​ដឹកនាំ​ក្រសួង​ការងារ ក៏មានការចូលរួមពីថ្នាក់ដឹកនាំជាន់ខ្ពស់នៃក្រសួងមហាផ្ទៃ ក្រសួងរៀបចំដែនដី​នគរូបនីយ​កម្ម និងសំណង់ ក្រសួងទេសចរណ៍ និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍​ផងដែរ។

នាឱកាសនោះ ឯកឧត្តមរដ្ឋមន្ត្រី បានលើកឡើង​ពីភាពចាំបាច់​ នៃ​កិច្ច​សហការ​អន្តរ​ស្ថាប័ន​របស់​ក្រសួង​ពាក់ព័ន្ធទាំងអស់ ដើម្បីគិតគូរបន្ថែមទៀតក្នុងការផ្តល់សុវត្ថិភាព និងការបង្ការ​គ្រោះ​អគ្គិភ័យ​ដល់រោងចក្រសហគ្រាស និងគ្រឹះស្ថានអាជីវកម្មទាំងអស់ ដែលជាទីតាំង​ប្រតិបត្តិការ​អាជីវកម្ម​បែប​ប្រមូលផ្តុំ។

បន្ទាប់ពីបានពិភាក្សា និងលើកជាយោបល់ពីតំណាងក្រសួងពាក់ព័ន្ធនីមួយៗយ៉ាងផុលផុស កិច្ច​ប្រជុំ បានឯកភាពឱ្យបង្កើតជាសេចក្តីណែនាំរួមស្តីពី វិធានការអប់រំ បង្ការ និង​ទប់ស្កាត់​ឱ្យ​បាន​ជា​អតិបរមា​នូវ​គ្រោះអគ្គិភ័យនៅតាមរោងចក្រសហគ្រាស គ្រឹះស្ថានក្នុងវិស័យកម្មន្តសាល និង​ឧស្សាហកម្មទេសចរណ៍ ដែលនេះគឺជាការគិតគូររបស់ សម្តេចនាយករដ្ឋមន្ត្រី ហ៊ុន ម៉ាណែត។

យោង​តាមសេចក្តីណែនាំរបស់ក្រសួងការងារបានឱ្យដឹងថាក្នុងរយៈពេលថ្មីៗកន្លងមកនេះ មាន​ករណី​អគ្គិភ័យកើតឡើងជាបន្តបន្ទាប់នៅតាម សហគ្រាស គ្រឹះស្ថានមួយចំនួន ដែលបាន​ធ្វើ​ឱ្យ​បាត់​បង់​អាយុជីវិតមនុស្ស និងប៉ះពាល់សុវត្ថិភាព និងសុខភាពការងាររបស់កម្មករនិយោជិត ដំណើរ​ការ​អាជីវកម្ម សន្តិសុខ និងសណ្តាប់ធ្នាប់សាធារណៈ និងស្របពេល​ដែល​មាន​ការ​ជូន​ដំណឹង​របស់ក្រសួងធនធានទឹក និងឧតុនិយមស្តីពីការឡើងកម្ដៅអាកាសធាតុរហូតដល់ ៤១°C នៅ​ក្នុង​ខែមេសា និងដើមខែឧសភាខាងមុខនេះ។

ក្រសួងការងារ បានក្រើនរំលឹក សាជាថ្មី និងណែនាំដល់ម្ចាស់ ឬនាយកសហគ្រាស គ្រឹះស្ថាន​ទាំងអស់​ត្រូវ​ចូលរួមពង្រឹងការអនុវត្តនូវវិធានការ បង្ការអគ្គិភ័យ និងវិធានការ​សុវត្ថិភាព និង​សុខភាព​ការងាររបស់កម្មករនិយោជិត សំដៅធានាបាននូវបរិយាកាស នៅកន្លែង​ធ្វើ​ការ​ប្រកប​ដោយ​សុវត្ថិភាព ទប់ស្កាត់បាននូវគ្រោះអគ្គិភ័យ និងករណីដួលសន្លប់នៅតាមសហគ្រាស គ្រឹះ​ស្ថាន ដោយត្រូវបង្កើនការយកចិត្តទុកដាក់ខ្ពស់ និងអនុវត្តឱ្យម៉ឺងម៉ាត់នូវវិធានការចាំបាច់ ដូចជា បង្កើន​ការ​ត្រួតពិនិត្យជាប្រចាំនូវបណ្តាញផ្គត់ផ្គង់ចរន្តអគ្គិសនី ធ្វើការវាស់កម្ដៅឧបករណ៍ផ្តល់ចរន្ត អគ្គិសនី ដោយគោរពតាមស្តង់ដារសុវត្ថិភាព និងថែទាំឧបករណ៍ផ្តល់ចរន្តអគ្គិសនី និងសម្ភារ​ដំណើរ​ការ ដោយចរន្តអគ្គិសនីទាំងឡាយ ដែលជាមូល​ហេតុ​បង្ក​ឱ្យ​មាន​អគ្គិភ័យ​កើត​ឡើង​ជាយ​ថា​ហេតុ​នៅ​កន្លែងធ្វើការ និងតាមដានជាប្រចាំសីតុណ្ហមាត្រដែលបានបំពាក់នៅក្នុងសហគ្រាស គ្រឹះស្ថាន​ជាដើម៕ អត្ថបទ៖ ឈិត បូរ៉ាវី