មនុស្សរាប់ម៉ឺននាក់ នៅក្នុងរដ្ឋឃ្វីនស៍ឡែន (Queensland) នៃប្រទេសអូស្ត្រាលី មិនមានថាមពលអគ្គិសនីប្រើប្រាស់ទេនៅថ្ងៃសុក្រ (២៦ មករា) នេះបន្ទាប់ពីព្យុះស៊ីក្លូនត្រូពិចមួយបានបោកបក់ពេញមួយយប់ ដែលនាំមកនូវខ្យល់កន្រ្តាក់ និងភ្លៀងធ្លាក់ខ្លាំង។

ព្យុះស៊ីក្លូនត្រូពិច ឃឺរីលី (Kirrily) ដែលជាប្រព័ន្ធអាកាសធាតុប្រភេទទី២ បានបោកបក់កាលពីល្ងាចថ្ងៃព្រហស្បតិ៍ នៅតាមឆ្នេរសមុទ្រជាប់នឹងតំបន់ថ្មប៉ប្រះទឹកដ៏ធំល្វឹងល្វើយ ហ្ក្រេត បារៀ រីហ្វ (Great Barrier Reef) នៅជិតទីក្រុងទេសចរណ៍ ថោនស៍វីល (Townsville) មុនពេលត្រូវបានបន្ទាបមកនៅព្យុះត្រូពិចកម្រិតទាបនៅថ្ងៃសុក្រ។

ប្រទេសអូស្ត្រាលី កំពុងស្ថិតក្នុងឥទ្ធិពលនៃព្រឹត្តិការណ៍អាកាសធាតុ អ៊ែល នីញ៉ូ (El Nino) ដែលជាធម្មតាត្រូវបានផ្សារភ្ជាប់ជាមួយនឹងបាតុភូតធ្ងន់ធ្ងរដូចជាព្យុះស៊ីក្លូន ចំហេះព្រៃ គ្រោះរាំងស្ងួត និងរលកកម្ដៅជាដើម។

ប្រមុខរដ្ឋ ឃ្វីនស៍ឡែន លោក ស្តេវិន ម៉ាយស៍ (Steven Miles) បានប្រាប់សារជីវកម្មផ្សព្វផ្សាយ ABC របស់អូស្រ្តាលីថា មនុស្សចំនួន ៦៤.០០០នាក់ មិនមានថាមពលប្រើប្រាស់ទេនៅថ្ងៃសុក្រដោយសារព្យុះនេះ។ ព្យុះត្រូពិច ឃឺរីលី គឺជាព្យុះស៊ីក្លូនត្រូពិចទីពីរនៅក្នុងតំបន់នេះចាប់តាំងពីខែធ្នូ មកនៅពេលដែលព្យុះស៊ីក្លូន ចាស្ពើ (Jasper) បានបង្កការខូចខាតយ៉ាងទូលំទូលាយក្នុងតំបន់៕