បរិមាណនៃចរាចរពាណិជ្ជកម្មឆ្លងកាត់ព្រែកជីក Suez បានធ្លាក់ចុះជាង ៤០ភាគរយ ក្នុងរយៈពេល ២ខែចុងក្រោយនេះ បន្ទាប់ពីមានការវាយប្រហារដោយក្រុមឧទ្ទាមហ៊ួទី របស់ប្រទេសយេម៉ែន។ នេះបើយោងតាមអង្គការសហប្រជាជាតិ (UN) ដែលសកម្មភាពនេះធ្វើឲ្យការព្រួយបារម្ភចំពោះពាណិជ្ជកម្មពិភពលោកកើនឡើងកាន់ខ្លាំង។

ក្រុមហ៊ួទីដែលគាំទ្រដោយអ៊ីរ៉ង់ និយាយថា ពួកគេកំពុងកំណត់គោលដៅលើអ្វីដែលពួកគេចាត់ទុកការដឹកជញ្ជូនពាណិជ្ជកម្ម និងយោធាដែលភ្ជាប់ទំនាក់ទំនងជាមួយអ៊ីស្រាអែល នៅក្នុងតំបន់ ដើម្បីជាការបង្ហាញសាមគ្គីភាពជាមួយប៉ាឡេស្ទីន នៅតំបន់ហ្កាហ្សា ដោយបានបង្ខំឲ្យក្រុមហ៊ុនដឹកជញ្ជូនទំនិញមួយចំនួនជ្រើសរើសផ្លូវធ្វើដំណើរឆ្ងាយជាង និងថ្លៃជាង ដើម្បីជៀសវាងការវាយប្រហារនេះ។

លោក Jan Hoffman ប្រធានសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍន៍ (UNCTAD) បានប្រាប់អ្នកសារព័ត៌មាន កាលពីថ្ងៃព្រហស្បតិ៍ (ទី២៥ ខែមករា) ថា៖ «យើងមានការព្រួយបារម្ភកាន់តែខ្លាំងឡើងៗដែលការវាយប្រហារលើការដឹកជញ្ជូន នៅសមុទ្រក្រហម កំពុងបន្ថែមភាពតានតឹងដល់ពាណិជ្ជកម្មពិភពលោក ដោយបង្កការរំខានដល់ពាណិជ្ជកម្ម (ដែលមានស្រាប់) កាន់តែខ្លាំងឡើង ដោយសារតែភូមិសាស្ត្រនយោបាយ និងបម្រែបម្រួលអាកាសធាតុ»។

យោងតាម UNCTAD បានឲ្យដឹងថា ការដឹកជញ្ជូនទំនិញដែលប្ដូរផ្លូវចេញពីសមុទ្រក្រហម ជំនួសវិញដោយការធ្វើនាវាចរ នៅជុំវិញជ្រោយ Cape of Good Hope របស់អាហ្វ្រិកខាងត្បូងនោះ បាននាំឲ្យមានការធ្លាក់ចុះ ៤២ភាគរយនៃការឆ្លងកាត់តាមព្រែកជីក Suez ក្នុងរយៈពេល ២ខែចុងក្រោយនេះ។

ព្រែកជីក Suez ក្នុងប្រទេសអេហ្ស៊ីប តភ្ជាប់សមុទ្រមេឌីទែរ៉ាណេជាមួយសមុទ្រក្រហម ហើយលោក Hoffman បាននិយាយថា ជាង ៨០ភាគរយនៃទំហំពាណិជ្ជកម្មទំនិញអន្តរជាតិ ត្រូវបានធ្វើតាមរយៈសមុទ្រនេះ។ លោកបានបន្តថា៖ «ការដឹកជញ្ជូនតាមសមុទ្រ គឺពិតជាការជួយដល់ពាណិជ្ជកម្មពិភពលោក»៕