នាវាទេសចរណ៍ដ៏ធំបំផុតរបស់ពិភពលោក បានចេញដំណើរលើកដំបូងរបស់ខ្លួនកាលពីថ្ងៃសៅរ៍ (២៧ មករា) ប៉ុន្តែក្រុមបរិស្ថានមានការព្រួយបារម្ភថា នាវាដើរដោយឧស្ម័នធម្មជាតិរាវមួយនេះ និង​​នាវា​ទេសចរណ៍យក្សផ្សេងទៀតដែលធ្វើដំណើរតាមនាវាដ៏ធំនេះ នឹងលេចធ្លាយឧស្ម័នមេតាន ដែល​​បង្កគ្រោះថ្នាក់យ៉ាងធ្ងន់ធ្ងរទៅក្នុងបរិយាកាស។

នាវាទេសចរណ៍​ដ៏​ធំឈ្មោះ អាយខន អហ្វ ដឹស៊ីស៍ (Icon of the Seas) របស់ក្រុមហ៊ុន រ៉ូយ៉ាល់ ការ៉ា​អ៊ីបអន្តរជាតិ (Royal Caribbean International) បានចេញដំណើរពីទីក្រុង ម៉ៃអាមី (Miami) របស់សហរដ្ឋអាមេរិក ដែលមានសមត្ថភាពផ្ទុកអ្នកដំណើរ ៨.០០០នាក់ ទូទាំង​សំណង់​កម្ពស់ ២០ជាន់របស់ខ្លួន ដោយទាញ​យក​អត្ថ​ប្រយោជន៍​ពី​ប្រជាប្រិយភា​ព​ដែល​កំពុង​កើន​ឡើង​នៃនាវាកម្សាន្ត។

នាវានេះត្រូវ​បានសាងសង់ឡើងដើម្បីដំណើរការលើឧស្ម័នធម្មជាតិរាវ (LNG) ដែលដំណើរ​ការ​បាន​ស្អាត​ជាង​ឥន្ធនៈតាមសមុទ្រធម្មតា ប៉ុន្តែបង្កហានិភ័យខ្ពស់សម្រាប់ការបំភាយឧស្ម័នមេតាន។ ក្រុម​បរិស្ថានបាននិយាយថា ការលេចធ្លាយឧស្ម័នមេតានចេញពីម៉ាស៊ីនរបស់នាវា គឺជាហានិភ័យ​ដែល​មិន​អាចទទួលយកបានចំពោះអាកាសធាតុ ដោយសារតែផល​ប៉ះពាល់​ដ៏​គ្រោះថ្នាក់​រយៈ​ពេល​ខ្លី​របស់វា។

ក្រុមហ៊ុន រ៉ូយ៉ាល់ ការ៉ាអ៊ីប និយាយថា នាវាថ្មីរបស់ខ្លួននេះមានប្រសិទ្ធភាពជាងនាវាផ្សេង ២៤​ភាគរយ ទៅលើការបំភាយឧស្ម័នកាបូន លើសពីតម្រូវការដោយនិយតករដឹកជញ្ជូនសកល គឺ​អង្គ​ការ​សមុទ្រអន្តរជាតិ (IMO)៕